გიგა ბოკერია: ISFED-ს პარალელური დათვლის შედეგები არასდროს ყოფილა კოზირი ოპოზიციის ხელში

დიდი ალბათობით, უკანონო, მიყურადების ან სხვა ფორმით, „ქართულმა ოცნებამ“ იცოდა ამის შესახებ და მახეს უგებდნენ ოპოზიციას, ელჩებთან, მოლაპარაკებებზე. არც მე და არც ევროპული საქართველოს არც ერთ წევრს არ აგვიღია ISFED-ის PVT რაიმის საზომად. PVT ვერანაირად ვერ აფიქსირებს ბიულეტენების ჩაყრასა და „კარუსელს“, - განაცხადა „ევროპული საქართველოს“ ერთ-ერთმა ლიდერმა, გიგა ბოკერიამ ტელეკომპანია „ფორმულას“ ეთერში საუბრისას.

„ის არსებულ ოქმებს ითვლის. ეს არასდროს არ ყოფილა კოზირი ოპოზიციის ხელში და შემთხვევითი არაა, რომ ის არასდროს მიხსენებია. სხვის ნაცვლად ვერ ვისაუბრებ. ცდებოდა ის, ვინც ამას ეყრდნობოდა, როგორც წყაროს. ეს არაა დარტყმა ოპოზიციაზე. პირიქით, ესაა დარტყმა ხელისუფლებაზე; გამოვლინდა, რომ ამ ფორმით, ცდილობდნენ ზეწოლას, ინფორმაციის მოპოვებას და იაფფასიანი, საბავშვო კომბინაციით მოქმედებას“ - განაცხადა გიგა ბოკერიამ.

სამართლიანი არჩევნებისა და დემოკრატიის საერთაშორისო საზოგადოება განმარტავს, რომ 31 ოქტომბრის არჩევნების პარალელური დათვლის შიდა აუდიტის შედეგებმა დაადასტურა PVT მეთოდოლოგის სიზუსტე და დამკვირვებლების მიერ მოწოდებული ინფორმაციის სანდოობა, თუმცა, გამოვლინდა ხარვეზი საარჩევნო სუბიექტების მიერ მიღებული ხმების გამოსათვლელ ფორმულაში. კერძოდ, საარჩევნო სუბიექტების მიერ მიღებულ ხმებთან ერთად, დაითვალეს ბათილი ბიულეტენებიც, რისი გასწორების შედეგადაც საარჩევნო სუბიექტების მიერ მიღებული ხმების პროცენტული რაოდენობა უმნიშვნელოდ შეიცვალა.