მიხეილ სარჯველაძე: ახალი კანონპროექტით „დავით გარეჯის“ საქმეზე ბრალდებულებს, ამნისტია არ შეეხებათ

პარლამენტის ადამიანის უფლებათა და სამოქალაქო ინტეგრაციის კომიტეტის თავმჯდომარის მიხეილ სარჯველაძის განცხადებით, საკანონმდებლო ორგანოში წარმოდგენილი კანონპროექტის თანახმად, „დავით გარეჯის“ საქმეზე ბრალდებულებს ამნისტია არ შეეხებათ.

„რამდენადაც ვფლობ ინფორმაციას, რა მუხლითაც „დავით გარეჯის“ საქმეზე მიმდინარეობს გამოძიება, ამ მუხლთან დაკავშირებით ამნისტიის ახალ კანონპროექტში არაფერია ნათქვამი“, - განაცხადა სარჯველაძემ.

გარკვეული კატეგორიის დანაშაულებზე ამნისტიის გამოცხადება იგეგმება.

7 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისთვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე. საქართველოს სისხლის სამართლის კოდექსის 308-ე მუხლის პირველი ნაწილით გათვალისწინებული დანაშაულის ნიშნებით.

7 ოქტომბერს პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.