დიმიტრი ხუნდაძე: საზოგადოების როლი არ არის არჩევნებში ერთჯერადად მონაწილეობა, ის არის ბიუჯეტში ფულადი რესურსის შემტანი, საიდანაც ფინანსდებიან პოლიტიკური პარტიები

საზოგადოების როლი არ არის არჩევნებში ერთჯერადად მონაწილეობა, ის არის ბიუჯეტში ფულადი რესურსის შემტანი, საიდანაც ფინანსდებიან პოლიტიკური პარტიები, - ამის შესახებ პარლამენტის ჯანდაცვის კომიტეტის თავმჯდომარემ, დიმიტრი ხუნდაძემ „დღის ქრონიკასთან“ საუბრისას განაცხადა.

მისი თქმით, საზოგადოება მთელი პოლიტიკური პროცესის მონაწილეა, ის არჩევნებში თავის დამოკიდებულებას აფიქსირებს და სწორედ საზოგადოებამ გადაწყვიტა, რომ ასეთი პოლიტიკური სპექტრით უნდა დაეკომპლექტებინა პარლამენტი.

„ვიღაცას მეტი ხმა ერგო, ვიღაცას - ნაკლები, მაგრამ არის ის შედეგი, რაც არის. საზოგადეობის როლი აქ არ მთავრდება. ის ამ პოლიტიკურ პროცესს ბოლომდე მიჰყვება. ისაა ბიუჯეტში ფულადი რესურსის შემტანი და შემდეგ აქედან ფინანსდება პოლიტიკური პარტიები, რაც არის საზოგადოების დაკვეთა, ესაა კონსტიტუციური გადაწყვეტილება. დღეს აღმოჩნდა, რომ გარკვეულ პოლიტიკურ ჯგუფებს დესტრუქციული ხაზი ჰქონდათ და არც ერთ შემთხვევაში, ისინი არჩევნებს არ აღიარებდნენ. მათ იციან, რომ ხალხის მხარდაჭერით ხელისუფლებაში ვერ მოვლენ და დესტრუქციული ხაზი რჩებათ. ისინი არ არიან შედეგით კმაყოფილები, მათ იცოდნენ, რომ ასეთი შედეგი დადგებოდა. ახლა პარლამენტში არ შემოდიან და თითქოს, ამით უხერხულობას მხოლოდ მმართველ გუნდს უქმნიან“, - განაცხადა დიმიტრი ხუნდაძემ.

მისივე თქმით, ვინც ამ ოპოზიციას კარგად იცნობს, არ უნდა უკვირდეს მათი ქცევა, რადგან დიდი ხანია ისინი დესტრუქციულ ხაზს მიჰყვებიან. „უახლოესი წარსულია, როცა ისინი წაგებულ ომს გამარჯვებულად ასაღებდნენ. ახლა მმართველი გუნდის მიერ მოგებულ არჩევნებს ასაღებენ წაგებულად და გაყალბებულად“, - აღნიშნა დიმიტრი ხუნდაძემ.

დეპუტატის თქმით, „მოქალაქეთა პოლიტიკური გაერთიანებების შესახებ“ კანონში განსახორციელებლი ცვლილებები აქტიურად განიხილება და მისი მიღება წლის ბოლომდე მოესწრება. კერძოდ, პროექტის თანახმად, სახელმწიფო ბიუჯეტიდან თანხას მხოლოდ ის პარტია მიიღებს, რომელიც მისთვის განკუთვნილ პარლამენტის წევრის მანდატს ან მანდატების ნახევარს მაინც აითვისებს. ხოლო პარტია მომავალი წლის საბიუჯეტო დაფინანსებას ვერ მიიღებს, თუ მისი წარდგენით არჩეულ პარლამენტის წევრთა ნახევარი მაინც არასაპატიო მიზეზით გააცდენს მიმდინარე მოწვევის პარლამენტის წინა წლის ყველა პლენარულ სხდომას. ასეთი შინაარსის მუხლის ასახვა „მოქალაქეთა პოლიტიკური გაერთიანებების შესახებ“ კანონში იგეგმება.

ოპოზიცია და მმართველი გუნდი მოლაპარაკებების მეხუთე რაუნდის მოლოდინში არიან. მხარეები იმედოვნებენ, რომ პოზიციების დაახლოებას შეძლებენ. მიუხედავად იმისა, რომ ხელისუფლების ოპონენტებს ახალი არჩევნები სურთ, „ქართულ ოცნებას“ კი - შეთანხმება არჩევნების გარეშე. მოლაპარაკებების შუამავალმა ელჩმა მხარეებს მკაფიოდ უთხრა, რომ უნდა გადაწყვიტონ, როგორ მიაღწიონ შეთანხმებას. წინააღმდეგ შემთხვევაში, მეხუთე რაუნდი ეფექტური ვერ იქნება.