არჩილ თალაკვაძე: მწიფდება პროცესი, როდესაც ოპოზიციური პარტიები ხვდებიან, რომ გზა, რასაც რადიკალური ნაწილი სთავაზობს დანარჩენ ოპოზიციას, ჩიხია

პარტია „ქართული ოცნება“ მოლაპარაკებებში რიგგარეშე არჩევნებს ან რაიმე მსგავს სცენარს არ განიხილავს , - ამის შესახებ საქართველოს პარლამენტის თავმჯდომარემ, არჩილ თალაკვაძემ „პალიტრანიუსის“ ეთერში განაცხადა.

მისი თქმით, ოპოზიციური პარტიები ხვდებიან, რომ ის გზა, რასაც რადიკალური ნაწილი სთავაზობს დანარჩენ ოპოზიციას, ჩიხია. არჩილ თალაკვაძე იმედს გამოთქვამს, რომ ჯანსაღი ოპოზიციური ძალები პარლამენტში შევლენ.

„საქართველოს კონსტიტუცია და საარჩევნო კანონმდებლობა ამბობს, რომ შემდეგი არჩევნები იქნება 2024 წლის შემოდგომაზე. შესაბამისად, ჩვენ, როგორც პარტია „ქართული ოცნება“ მოლაპარაკებებში არ განვიხილავთ რიგგარეშე არჩევნებს, არ განვიხილავთ ამ მოლაპარაკებებში რაიმე მსგავს სცენარს, ვინაიდან, დარწმუნებულები ვართ, რომ ოპოზიციის ბრალდება, თითქოს არჩევნები გაყალბდა, საფუძველს მოკლებულია. ამ ვითარების განმუხტვის ერთადერთ სამართლიან საშუალებად მივიჩნევთ, რომ პირველ რიგში გადავამოწმოთ არის თუ არა ეს ბრალდება სიმართლე. როდესაც სიმართლე გვეცოდინება, შემდეგ ვიმსჯელოთ, რა უნდა გავაკეთოთ დანარჩენი მიმართულებით.

დღეს ოპოზიციის რადიკალური ნაწილი კრიზისშია, ვინაიდან, ერთს არ სჯერა, რომ არჩევნებით დაბრუნდება ხელისუფლებაში, მეორეს კი ეს არჩევნები ისე აქვს წაგებული, რომ ხალხს პირდაპირ ატყუებს, თითქოს უარს ამბობს პარლამენტში შესვლაზე. არცერთ ამ ლიდერს, ვისაც დღეს ეკრანებზე ვხედავთ, მანდატი არ აქვთ რეალურად მიღებული და ვერც შედიან პარლამენტში. ეს სტატუს-კვო მალე შეიცვლება. დარწმუნებული ვარ, მოლაპარაკებებით ჩვენ შევძლებთ ჯანსაღი ოპოზიციური ძალების დარწმუნებას, რომ ისინი პარლამენტში შემოვიდნენ. ვფიქრობ, შიგნითაც მწიფდება პროცესი, როდესაც ოპოზიციური პარტიები ხვდებიან, რომ ეს გზა, რასაც რადიკალური ნაწილი სთავაზობს დანარჩენ ოპოზიციას, ჩიხია. ეს არის რეალურად კრიზისში შემყვანი“, - განაცხადა თალაკვაძემ.

კითხვაზე, რა მოხდება იმ შემთხვევაში, თუ თითზე ჩამოსათვლელი იქნება იმ ოპოზიციონერი დეპუტატების რაოდენობა, ვინც პარლამენტში შევა, არჩილ თალაკვაძე დასძენს, რომ ის ჯამური რაოდენობა, რაც უკვე პარლამენტშია, საკმარისია გადაწყვეტილებების მისაღებად. თუმცა აქვე დასძენს რომ რადიკალურმა ოპოზიციამ, რომელმაც დაკარგა „გაყალბებული არჩევნების“ ცრუ ბრალდება, დაკარგავს იმასაც, რომ თითქოს ეს პარლამენტი ერთპარტიულია.

„ყველა პარტია, ვინც შევიდა პარლამენტში თითებზე ეტევა. სულ 9 პარტია არის, თუ 2-ს გამოვაკლებთ, ეს ნიშნავს რომ „ქართული ოცნების“ გარდა კიდევ 7 პოლიტიკური პარტია არის ოპოზიციაში. დაველოდოთ მათ პასუხებს. ჯამური რაოდენობა, რაც უკვე პარლამენტშია, საკმარისია გადაწყვეტილებების მისაღებად. ამას როდესაც დაემატება ჯანსაღი ოპოზიცია, იქნება პარლამენტი, სადაც არა ერთი, არამედ რამდენიმე პოლიტიკური პარტია იქნება წარმოდგენილი. ეს ჩემი პროგნოზით ძალიან მალე მოხდება.

რადიკალურმა ოპოზიციამ, რომელმაც დაკარგა „გაყალბებული არჩევნების“ ცრუ ბრალდება, დაკარაგავს იმასაც, რომ თითქოს ეს პარლამენტი ერთპარტიულია. ამასაც დაკარგავს ძალიან მალე“, - განაცხადა თალაკვაძემ.