არჩილ თალაკვაძე: ჯანსაღ ოპოზიციასთან პირდაპირი მოლაპარაკებების რესურსსაც გამოვიყენებთ, არ გამიკვირდება, რადიკალურმა ოპოზიციამ დიალოგის პროცესსაც ვაჭრობა დაარქვას

ჯანსაღ ოპოზიციასთან რა თქმა უნდა, პირდაპირი მოლაპარაკებების რესურსსაც გამოვიყენებთ მომდევნო პერიოდში და გარწმუნებთ, რომ მხოლოდ და მხოლოდ სამართლიანი არგუმენტებით, - ამის შესახებ პარლამენტის თავმჯდომარემ, არჩილ თალაკვაძე „პალიტრანიუსის“ ეთერში განაცხადა.

მისი თქმით, მთავარი პლატფორმა, სადაც საუბრობენ, არის მოლაპარაკებები, რომლებიც ქალბატონი დეგნანის და ბატონი ჰარცელის ფასილიტაციით იმართება.

„მთავარი პლატფორმა, სადაც ვსაუბრობთ, არის მოლაპარაკებები, რომლებიც ქალბატონი დეგნანის და ბატონი ჰარცელის ფასილიტაციით იმართება. ამის გარდა, ჯანსაღ ოპოზიციასთან რა თქმა უნდა, პირდაპირი მოლაპარაკებების რესურსსაც გამოვიყენებთ მომდევნო პერიოდში და გარწმუნებთ, რომ მხოლოდ და მხოლოდ სამართლიანი არგუმენტებით. აქ საუბარი არაა, რომ ვინმე ცდილობს ვინმეს თავისი სუბიექტური დამოკიდებულება დააძალოს ან გადაარწმუნოს. მხოლოდ და მხოლოდ სამართლიანი პირობებით, რაც ნიშნავს, რომ გვდებენ ბრალს არჩევნების გაყალბებაში? - ეს გადავამოწმოთ ეფექტური მექანიზმით. პარლამენტს შეუძლია შექმნას ორპარტიული კომისია, რომელსაც ამის მოკვლევის და შეფასების საშუალება აქვს“, - განაცხადა არჩილ თალაკვაძემ.

რაც შეეხება ოპოზიციის შეფასებას, რომ „პარლამენტი დეზერტირების ბაზარს დაემსგავსა“ და საკანონმდებლო ორგანოში შესვლასთან დაკავშირებით ვაჭრობა ხდება, არჩილ თალაკვაძე ოპოზიციასთან მოლაპარაკების პროცესში ვაჭრობას გამორიცხავს.

„არ ვიცი, რა ვაჭრობაზე საუბრობენ. არ გამიკვირდება, დიალოგის პროცესსაც ვაჭრობა დაარქვას ამ ხალხმა რადიკალური ოპოზიციიდან, რადგან ისინი თავს ესხმოდნენ ელჩებს, დასავლურ ინსტიტუტებს, მათგან რა უნდა გაგვიკვირდეს? რეალურად, დღეს ჩვენ გვაქვს დიალოგი და მხოლოდ და მხოლოდ ამ დიალოგის ფარგლებში შევეცდებით ეს მოლაპარაკებები კონკრეტული შედეგით დავასრულოთ, თუმცა პირდაპირი მოლაპარაკების შესაძლებლობასაც ჩვენ გამოვიყენებთ“, - განაცხადა პარლამენტის თავმჯდომარემ.