ნიკოლოზ სამხარაძე: არანაირი საზღვრების დადგენა რუსეთის ფედერაციასთან არ მოხდება მანამ, სანამ აფხაზეთი და ცხინვალი ოკუპირებულია

ნიკოლოზ სამხარაძემ ვლადიმერ პუტინის გადაწყვეტილება შეაფასა, რომლითაც რუსეთის ფედერაციის პრეზიდენტმა დსთ-ს ქვეყნებთან სახელმწიფო საზღვრების დემარკაციის საკითხებში ახალი სპეციალური წარმომადგენელი დანიშნა. როგორც საგარეო ურთიერთობათა კომიტეტის თავმჯდომარემ აღნიშნა, მიხაელ პეტრიაკოვის დანიშვნა ჩვეულებრივი საკადრო ცვლილებაა.

„საზღვრების დადგენა მათ უნდა 2008 წლის შემდეგ. 12 წელია მათ უნდათ საზღვრების დადგენა. არაფრის დემონსტრირება არ იყო, ეს იყო ჩვეულებრივი საკადრო ცვლილება, რომელიც შეიძლება ნებისმიერი ქვეყნის, ნებისმიერ სამინისტროში მოხდეს. ადრეც არსებობდა ეს სამმართველო და უბრალოდ, ამ სამმართველოში შეიცვალა ერთი ადამიანი. ჩვენი პოზიცია არის ძალიან მყარი. არანაირი საზღვრების დადგენა რუსეთის ფედერაციასთან არ მოხდება მანამ, სანამ რუსეთს აქვს ოკუპირებული აფხაზეთის და ცხინვალის რეგიონი და ვერც ვერავინ, საერთაშორისო საზოგადოებაში ვერ აღიარებს ამ ფიქტიური საზღვრების დადგენას. საერთაშორისო საზოგადოება და საერთაშორისო სამართალი არის საქართველოს მხარეს. ამ შემთხვევაში ჩვენი ბერკეტი ეს არის. ერთადერთი რასაც ჩვენ რუსეთს ვუპირისპირებთ არის საერთაშორისო საზოგადოების მობილიზება და მათი მხარდაჭერა“, - განაცხადა სამხარაძემ.

რუსეთის პრეზიდენტმა ვლადიმერ პუტინმა დსთ-ს ქვეყნებთან სახელმწიფო საზღვრების დემარკაციის საკითხებში ახალი სპეციალური წარმომადგენელი დანიშნა. რუსული მედიის ინფორმაციით, აღნიშნული თანამდებობა მიხაელ პეტრიაკოვმა დაიკავა, რომელიც ასევე იქნება რუსეთის დელეგაციის ხელმძღვანელი კასპიის ზღვის მრავალმხრივ მოლაპარაკებებზე.

საქართველოს საგარეო საქმეთა სამინისტროში განაცხადეს, რომ რუსეთის ფედერაციასა და საქართველოს შორის საზღვრების დელიმიტაცია-დემარკაციის საკითხი არ შეიძლება დღის წესრიგში დადგეს, ვიდრე მოსკოვის მიერ აფხაზეთისა და ცხინვალის რეგიონების დეოკუპაცია არ მოხდება და 2008 წლის 12 აგვისტოს შეთანხმება ცეცხლის შეწყვეტის შესახებ სრულად არ შესრულდება.