დავით ზალკალიანი: უკვე უნდა დავიწყოთ მოქმედება, როგორც ევროკავშირის წევრმა ქვეყანამ და ევროკავშირს დავანახოთ ჩვენი მიმზიდველობა და ფუნქცია

უკვე უნდა დავიწყოთ მოქმედება, როგორც ევროკავშირის წევრმა ქვეყანამ და ევროკავშირს დავანახოთ ჩვენი მიმზიდველობა და ფუნქცია, - ამის შესახებ საგარეო საქმეთა მინისტრმა, დავით ზალკალიანმა „ქრონიკაში“ განაცხადა.

მისი თქმით, მნიშვნელოვანია, რომ პარლამენტის პირველი რეზოლუცია სწორედ საგარეო ურთიერთობებს ეხება და საგარეო პოლიტიკის ძირითად სტრატეგიულ კურსთან არის სრულ თანხვედრაში.

„ეს არის, რა თქმა უნდა, გზავნილი ჩვენი დასავლელი პარტნიორებისთვის და ასევე ქვეყნის შიდა კონსოლიდაციისთვის არის უაღრესად მნიშვნელოვანი. ის ამბიციური გეგმები, რომლებიც ამ რეზოლუციაშია და ჩვენი საგარეო პოლიტიკის სტრატეგიის ძირითად მიმართულებებს წარმოადგენს, ამ გეგმების შესასრულებლად აუცილებელია მთლიანად ქვეყნის შიგნით კონსოლიდაცია, მუშაობა უკვე დღეიდანაა დასაწყები, რომ ის ამოცანები, იგივე ევროკავშირში ინტეგრაციის კუთხით, ასოცირების დღის წესრიგის შესრულება, ასევე 2021-2027 წლის გეგმის შესრულება, ჩვენ, ფაქტობრივად, უკვე უნდა დავიწყოთ მოქმედება, როგორც ევროკავშირის წევრმა ქვეყანამ. ევროკავშირს უნდა დავანახოთ ჩვენი მიმზიდველობა და ფუნქცია“, - განაცხადა დავით ზალკალიანმა.

პრემიერ-მინისტრმა, გიორგი გახარიამ განაცხადა, რომ ახალი მოწვევის პარლამენტში პირველი საკანონმდებლო ინიციატივის დამტკიცება არის კიდეც საქართველოს საგარეო პოლიტიკის მიზნების განმტკიცება.

საქართველოს პარლამენტმა საგარეო პოლიტიკის შესახებ რეზოლუციის პროექტი დაამტკიცა.