დავით ზალკალიანი: ყველა პოლიტიკური პარტია, რომელსაც გეზი ქვეყნის დასავლეთში ინტეგრაციისკენ აქვს აღებული, ამ მიზნის მიღწევაში ერთიანი უნდა იყოს

„პარლამენტის პირველი რეზოლუცია სწორედ საგარეო ურთიერთობებს ეხება და საგარეო პოლიტიკის ძირითად სტრატეგიულ კურსთან არის სრულ თანხვედრაში“, - ასე შეაფასა საქართველოს საგარეო საქმეთა მინისტრმა, დავით ზალკალიანმა საქართველოს საკანონმდებლო ორგანოს მიერ მიღებული პირველი რეზოლუცია და დოკუმენტში განსაზღვრულ ძირითად მიმართულებებზე გაამახვილა ყურადღება.

მისივე თქმით, ზემოაღნიშნული რეზოლუცია წარმოადგენს ძალიან მკაფიო გზავნილს საქართველოს ყველა პარტნიორის მიმართ იმის შესახებ, თუ საით მიდის ქვეყანა, რა არის მისი ძირითადი საგარეო პოლიტიკური კურსი და კიდევ ერთხელ არის დადასტურება იმისა, რომ ქვეყნის ევროპული და ევროატლანტიკური ინტეგრაცია არის შეუქცევადი.

ამასთან, საგარეო უწყების ხელმძღვანელმა ხაზგასმით აღნიშნა საერთო მიზნისთვის ქვეყნის შიგნით კონსოლიდაციის მნიშვნელობა და საკანონმდებლო და აღმასრულებელი ხელისფულების, ისევე როგორც სამოქალაქო საზოგადოების ერთობლივი მუშაობის აუცილებლობა.

„პირველ რიგში, ეს, რა თქმა უნდა, არის გზავნილი ჩვენი დასავლელი პარტნიორებისთვის და ასევე ქვეყნის შიდა კონსოლიდაციისთვის არის უაღრესად მნიშვნელოვანი, რადგანაც ის ამბიციური გეგმები, რომლებიც ამ რეზოლუციაშია და ჩვენი საგარეო პოლიტიკის სტრატეგიის ძირითად მიმართულებებს წარმოადგენს, ამ გეგმების შესასრულებლად აუცილებელია მთლიანად ქვეყნის შიგნით კონსოლიდაცია, როგორც საკანონმდებლო, ისე აღმასრულებელი ხელისუფლების, ასევე სამოქალაქო საზოგადოების ჩართულობა.

ყველა პოლიტიკური პარტია, რომელსაც აქვს გეზი და კურსი აღებული ქვეყნის დასავლეთში ინტეგრაციისკენ, უნდა იყოს ერთიანი ამ მიზნის მიღწევაში. წარმოუდგენელია, რომ თუკი ეს კონსოლიდაცია არ იქნა და თუკი ყველა ინსტიტუტი არ იქნა გაერთიანებული ამ მიზნის გარშემო, ჩვენ შედეგს მივაღწიოთ“, - განაცხადა მინისტრმა.

უწყების ხელმძღვანელის განმარტებით, პარალმენტის მიერ მიღებული რეზოლუცია იქნება ერთგვარი გზამკვლევი საგარეო პოლიტიკის პრიორიტეტების დასახვის მიმართულებით.

„მნიშვნელოვანია ასევე ისიც, რომ ჩვენ გქვენება ჩვენი საკანონმდებლო ხელისუფლების მხრიდან მთავარი სახელმძღვანელო, როგორც აღმასრულებელ ხელისუფლებას, რომ ყველა ის მიმართულება, რომელიც ამ სტრატეგიის დოკუმენტში არის განსაზღვრული, იყოს სრულ თავსებადობაში ჩვენი საგარეო პოლიტიკის სტრატეგიასთან და სამოქმედო გეგმასთან“, - განმარტა ზალკალიანმა და დასძინა, რომ ამასთან, საგარეო უწყებას კონკრეტულ მიმართულებებზე ექნება კონკრეტული სამოქმედო გეგმა.

„ბუნებრივია, გათვალისწინებული იქნება ახალი გარემოებებიც, რომლებიც რეგიონში შექიმნა, ახალი გეოპოლიტიკური ვითარება. ჩვენ აუცილებლად უნდა ვიყოთ სწრაფი რეაგირების რეჟიმში. ქვეყანა სწარაფად უნდა რეაგირებდეს ახალ გამოწვევებზე“, - აღნიშნა ზალკალიანმა.

დავით ზალკალიანმა ხაზი გაუსვა ევროკავშირში გაწევრიანებისთვის საქართველოს მხრიდან უფრო მეტი ჩართულობის აუცილებლობასაც.

„ჩვენ, ფაქტობრივად, უკვე უნდა დავიწყოთ მოქმედება, როგორც ევროკავშირის წევრმა ქვეყანამ. ევროკავშირს უნდა დავანახოთ ჩვენი მიმზიდველობა და ჩვენი ფუნქცია. ამიტომ, ეს მოითხოვს ჩვენი მხრიდან გაასმაგებულ ენერგიას, ყველა სტრუქტურის და ყველა ინსტიტუტის კონსოლიდაციას ამ მიზნის გარშემო, რაც საბოლოო ჯამში დაგვეხმარება ამ მიზნის მიღწევაში“, - აღნიშნა უწყების ხელმძღვნელმა და დასძინა, რომ პარალმენტის მიერ მიღებული რეზოლუცია განსაზღვრავს იმ ძირითად გეზს და მიმართულებას, საითკენაც მიისწრაფვის საქართველო.

„ძალიან მნიშვნელოვანია ის პრიორიტეტული მიმართულებები, რომლებიც გამოიკვეთა. პირველ რიგში ეს არის დეოკუპაცია, რომელიც ჩვენი საგარეო პოლიტიკის ერთ-ერთი მთავარი პრიორიტეტული მიმართულებაა. ასევე ის ამბიციური განაცხადი, რაც არის დაკავშირებული საქართველოს მზაობასთან, 2024 წელს გააკეთოს განაცხადი ევროკავშირში გაწევრიანებსთან დაკავშირებით. ასევე ჩრდილო-ატლანტიკური ინტეგრაციის კუთხით სტრატეგიულ პარტნიორებთან ურთიერთობების კიდევ უფრო გაღრმავება, მეზობლებთან ურთიერთობების გაღრმავება. ყველა ის ძირითადი მიმართულება, რომელიც ჩვენი საგარეო პოლიტიკის მთავარ პრიორიტეტებს წარმოადგენს, ასახულია საქართველოს პარლამენტის ამ რეზოლუციაში“, - განცხადა მინისტრმა.

პრემიერ-მინისტრმა, გიორგი გახარიამ განაცხადა, რომ ახალი მოწვევის პარლამენტში პირველი საკანონმდებლო ინიციატივის დამტკიცება არის კიდეც საქართველოს საგარეო პოლიტიკის მიზნების განმტკიცება.

საქართველოს პარლამენტმა საგარეო პოლიტიკის შესახებ რეზოლუციის პროექტი დაამტკიცა.