არჩილ თალაკვაძე: ანტისემიტიზმს ჩვენი გუნდის ვერცერთი წევრი ვერასოდეს გაიზიარებს

ანტისემიტიზმის ადგილი ჩვენს საზოგადოებასა და ქვეყანაში არასდროს ყოფილა, არც დღეს არის და არც მომავალში იქნება,- ამის შესახებ საქართველოს პარლამენტის თავმჯდომარემ, არჩილ თალაკვაძემ ჟურნალისტებს განუცხადა.

„ჩვენ ყოველთვის გვქონდა ჰუმანიზმზე, ძმობაზე, მეგობრობასა და სოლიდარობაზე დაფუძნებული ურთიერთობები და რა თქმა უნდა დღესაც, ჩვენს ქვეყანაში ეს ურთიერთობები გრძელდება იმ საუკეთესო სახით, როგორც ეს იყო ყოველთვის ტრადიციულად.

ანტისემიტიზმს ჩვენი გუნდის ვერცერთი წევრი ვერასოდეს გაიზიარებს და საქართველოში ანტისემიტიზმის ადგილი არ არის“, - განაცხადა არჩილ თალაკვაძემ.

იქამდე, საგარეო საქმეთა მინისტრმა, დავით ზალკალიანმა Twitter-ის გვერდზე დაწერა: „ანტისემიტიზმის უმცირესი გამოვლინებაც კი ვერასოდეს იპოვის ადგილს ქართველის გულსა და ცნობიერებაში. ქართველი და ებრაელი ხალხის მომავალი მუდამ იქნება ძმობა და ერთობა“.

საქართველოში ისრაელის ელჩის, რან გიდორის განცხადებით, ქუთაისის სულხან-საბას დასახლების სამების ეკლესიის წინამძღვარმა, დეკანოზმა ილია კარკაძემ ანტისემიტური შეთქმულების რამდენიმე თეორია „გადმოანთხია”.

დეკანოზმა ქადაგებისას თქვა: „ჩვენ როცა ვსაუბრობთ გინდა ქართველებზე, გინდა სხვა მოძმე და განსაკუთრებით ძალიან ახლო ურთიერთობა გვაქვს ებრაელებთან, მაგრამ ისიც უნდა შევახსენოთ, რომ ცოტა შენ გიჭირდა და ჩვენ ჩაგიხუტეთ, შენ უნდა გესმოდეს, რომ არ უნდა გააკეთო ასე, სულხან-საბას იგავივით, კუ და მორიელივით".