არჩილ თალაკვაძე: ოპოზიცია, რომელიც არჩევნების მოთხოვნით რჩება ქუჩაში, დარჩება ბოლომდე ქუჩაში

მოლაპარაკების მაგიდაზეა ჩვენი სამართლიანი შეთავაზება: თუ არჩევნებში მართლაც იყო პრობლემები ერთად გადავამოწმოთ და თვითმმართველობის არჩევნებამდე საარჩევნო რეფორმის შემდეგი ეტაპი განვახორციელოთ ერთად. ვფიქრობ, ეს სამართლიანი შეთავაზებაა, - ამის შესახებ საქართველოს პარლამენტის თავმჯდომარემ, არჩილ თალაკვაძემ ბრიფინგზე განაცხადა.

მას კითხვით მიმართეს, გაიამრთება თუ არა მე-5 რაუნდი.

„თუ ოპოზიციის ნაწილი მზადაა, გამოვიდეს რადიკალური ოპოზიციის პოლიტიკური შანტაჟიდან და დავასრულოთ ის ღიმილისმომგვრელი, მოდელირებული რეალობა, როდესაც უმანდატო ოპოზიციონერები არჩევნებში გასულ ოპოზიციონერებს მანდატებს უხევენ, ასეთ შემთხვევაში, ჩვენ მზად ვართ ნებისმიერ დროს შეხვედრისათვის და სამომავლო გეგმებზე მოლაპარაკებისთვის. რა თქმა უნდა, სხვა შემთხვევაში, მით უფრო იმ ულტიმატუმით, რომელსაც რადიკალური ოპოზიციისგან ვისმენთ - ავრევთ ქვეყანას, თუ არ ჩაატარებთ არჩევნებს, მიუღებელია. გარწმუნებთ, ოპოზიცია, რომელიც ამის გამო რჩება ქუჩაში, დარჩება ბოლომდე ქუჩაში. ჩვენ პარლამენტში ველით ჯანსაღ ოპოზიციას და მზად ვართ ჯანსაღი ოპონირებისთვის“, - განაცხადა თალაკვაძემ.