ნიკოლოზ მეტრეველი: რევოლუცია არასდროს ხდება, თუ ფაქტობრივი გარემოებები არ არსებობს

ეს ადამიანები ქვეყანაში სიტუაციის დამძიმებას ელოდებიან, რომ რაც შეიძლება მეტი ადამიანი იყოს ცუდად, შიოდეს და ამ ნანგრევებზე მოვიდნენ ხელისუფლებაში, - ასე შეაფასა ანალიტიკოსმა ნიკოლოზ მეტრეველმა რადიკალური ოპოზიციის მიერ დაანონსებული რევოლუცია და „ცხელი გაზაფხული“ გადაცემაში „იმედის ფაქტორი“.

„დღეს, ოპოზიციის რიგებში არავითარი პოზიტიური დღის წესრიგი არაა. საუბრობენ მხოლოდ იმაზე და აქვთ მხოლოდ იმის იმედი, რომ გაზაფხულზე, რამენაირად, ხელისუფლებას პრობლემები შეექმნება. რევოლუცია არასდროს ხდება, თუ ფაქტობრივი გარემოებები არ არსებობს. რევოლუციას ყოველთვის ჰქონდა მიზეზ-შედეგობრივი კავშირი. მე არაერთი აქციის მონაწილე ვარ და ვიცი, 2008 წლის იანვარში, გაყალბებული საპრეზიდენტო არჩევნების შემდეგ, როგორი მუხტი იყო. დღეს, 40 პარტია საუბრობს რაღაც სერიოზულ მუხტზე და ელემენტარულად, 40 პარტიას 5 ათასი კაცი ვერ გამოჰყავს ქუჩაში. გარდა ამისა, რაიმე რეგულაციები უნდა დაწესდეს, რადგან სიბინძურის ნიაღვარი მოედინება მათი ტელევიზიებიდან. ბატონ ირაკლი კობახიძეს, ჰქონდა ინიციატივა და დიდი იმედი მაქვს, რომ ამას შედეგი ექნება და სხვადასხვა ქვეყნიდან, გაურკვეველი ადამიანები აღარ ჩაერთვებიან და მოწოდებებს არ გააკეთებენ. ახლა იმდენად დაუცველი ვართ, რომ შეიძლება, აფრიკიდან, ბოკო-ჰარამის ლიდერი ჩაერთოს და რევოლუციისკენ, არეულობისკენ, ან ტერორიზმისკენ მოგვიწოდოს. მათ შორის, წერტილი უნდა დაესვას დეზერტირი სააკაშვილის გამოხტომებს, საზოგადოების განერვიულებასა და მსგავს მოწოდებებს“ - განაცხადა ნიკოლოზ მეტრეველმა.

ბოლო რამდენიმე დღეა, ოპოზიციამ რევოლუციისკენ მოწოდებები კვლავ გაააქტიურა. ისინი პოზიციას არ ცვლიან და აცხადებენ, რომ საპარლამენტო მანდატებზე უარს ამბობენ, თუ მათი მოთხოვნები არ შესრულდება. რევოლუციური სცენარისა და „ცხელი გაზაფხულის“ დაანონსების მიუხედავად, ოპოზიციონერები აცხადებენ, რომ პროტესტის მშვიდობიანი გზით გამოხატვას გეგმავენ.