ბუბა ხოტივარი: არაფერს დაუნგრევია საქართველო ისე, როგორც - „ვარდების რევოლუციამ“ - რევოლუცია ყველგან, ყველა ეპოქაში უბედურებით მთავრდება

„ვარდების რევოლუციის“ შემდეგ, აღარავინ ამბობს: „მეც იქ ვიყავი“. ყველა მალავს. ყველას რცხვენია იმ რევოლუციის. მხოლოდ რამდენიმე ღირსეული ადამიანი ვიცი, რომელმაც აღიარა, რომ შეცდა. არაფერს დაუნგრევია საქართველო ისე, როგორც - „ვარდების რევოლუციამ“, - ამის შესახებ ტელეკომპანია „იმედის“ გადაცემაში „იმედის ფაქტორი“ რეჟისორმა, ბუბა ხოტივარმა განაცხადა.

„საზოგადოებაში ღირსება რომ არსებობს, სწორედ ამიტომაა, რომ ოპოზიცია ფართხალებს. ეს საცოდაობაა და ესაა უბედური ხალხი, რომელიც ჩიხშია. ოპოზიციის მდგომარეობა იმას ჰგავს, ჭაობში რომ ხარ და ყოველი მოძრაობა გძირავს. რა ქნან, აღარ იციან, რადგან ყველაფერი წააგეს და ყველაფერზე უარს ამბობენ. სამწუხაროდ, საქართველოში სერიოზული ოპოზიცია ვერ ჩამოყალიბდა. იმედია, კონსტრუქციული ოპოზიცია ჩამოყალიბდება, თორემ ეს რა ოპოზიციაა? ეს კომედიაა. დააკვირდით, „ვარდების რევოლუციის“ შემდეგ, აღარავინ ამბობს: „მეც იქ ვიყავი“. ყველა მალავს. ყველას რცხვენია იმ რევოლუციის. მხოლოდ რამდენიმე ღირსეული ადამიანი ვიცი, რომელმაც აღიარა, რომ შეცდა. არაფერს დაუნგრევია საქართველო ისე, როგორც - „ვარდების რევოლუციამ“. რევოლუცია ყველგან, ყველა ეპოქაში უბედურებით მთავრდება. რაც არ უნდა აღგზნებული და კეთილგანწყობილი ლიდერები ჰყავდეს, ეს ლიდერები იღუპებიან და ქვეყანა ნაძირლების ხელში ვარდება - გამონაკლისის გარეშე. ესაა უბედური ხალხი, რომელიც ვეღარც უკან დახევას ბედავს. სულ იტყუებიან. ჩემი პროფესიის ხალხი ძალიან კარგად ვხედავთ, ვინ იტყუება. ჩვენ მსახიობებთან ვმუშაობთ და მათ ვასწავლით, როდის რა გამომეტყველება ჰქონდეთ. ნიჭიერი მსახიობები ძალიან კარგად ითვისებენ ამას. ჩვენს ოპოზიციას ძალიან კარგად ეტყობა, რომ ძალიან ცუდ დღეში არიან. ხალხი ელოდება, როდის დაიწყებს მუშაობას. რა რევოლუცია? რევოლუცია რომ უხსენო, შეიძლება, ძალიან სერიოზულად დაგიპირისპირდებიან. ხელისუფლებამ თავის უწყებაში უნდა ჩაატაროს რეორგანიზაცია. არ უნდა დავწყნარდეთ იმით, რომ მათ 5% აქვთ. რევოლუცია ათასნაირია. შეიძლება, ოპოზიცია რაღაც გადატრიალებაზე წავიდეს. მართლა კედელთან არიან მიყენებულები. შეიძლება, შიგნიდან დაიწყონ ქვეყნის აფეთქება. 2012 წლიდან, მას შემდეგ, რაც ხალხი ბიძინა ივანიშვილის გარშემო შეიკრა, ვიცოდით, რომ საქართველო გადასარჩენი იყო. დღესაც იგივე მდგომარეობაა. იცოდეთ, რომ საქართველო არასდროს ასეთი შეკრული არ ყოფილა, როგორც დღეს. ამიტომ კივის ოპოზიცია“ - განაცხადა ბუბა ხოტივარმა.

ბოლო რამდენიმე დღეა, ოპოზიციამ რევოლუციისკენ მოწოდებები კვლავ გაააქტიურა. ისინი პოზიციას არ ცვლიან და აცხადებენ, რომ საპარლამენტო მანდატებზე უარს ამბობენ, თუ მათი მოთხოვნები არ შესრულდება. რევოლუციური სცენარისა და „ცხელი გაზაფხულის“ დაანონსების მიუხედავად, ოპოზიციონერები აცხადებენ, რომ პროტესტის მშვიდობიანი გზით გამოხატვას გეგმავენ.