მიხეილ სარჯველაძე: არ შეიძლება, დავით გარეჯის საკითხი პოლიტიკური სპეკულაციების საგანი გახდეს

არ შეიძლება, საქართველოსთვის უაღრესად დიდი მნიშვნელობის საკითხი – დავით გარეჯი პოლიტიკური სპეკულაციების საგანი გახდეს და ვიღაცის სრულიად მერკანტილური ინტერესების სამსახურში იყოს ჩაყენებული მისი შედეგის მიუხედავად, რადგან არის სრულიად ამორალური, უპასუხისმგებლო და მოღალატეობრივი პოზიცია ბევრის მხრიდან, – ამის შესახებ ჟურნალისტებს პარლამენტის ადამიანის უფლებათა დაცვის კომიტეტის თავმჯდომარემ, მიხეილ სარჯველაძემ განუცხადა.

„ძალიან დიდია მონდომება ამ ადამიანებისა და პოლიტიკური ჯგუფების მხრიდან, რომ ვითარებას მაქსიმალურად მეტი პოლიტიკური ელფერი მიეცეს, რომ ინსინუაციების ან სპეკულაციების შედეგად, ამ საქმეზე ჭეშმარიტება იყოს დაფარული საზოგადოებისთვის. საკითხთან დაკავშირებით ყველაფერი მოვისმინეთ გარდა იმისა, რაც სინამდვილის გარკვევას უნდა ემსახურებოდეს.

კონკრეტული ბრალდების შინაარსთან დაკავშირებით არცერთი დამაჯერებელი ახსნა არ მოგვისმენია და ოპოზიციური ძალები და უშუალოდ ბრალდებულებიც დაკავებულები იყვნენ იმის გაცხადებით, რომ გარეჯი საქართველო არ არის. სრულიად საწინააღმდეგოს ახსნას ვცდილობთ და დავასაბუთოთ იმ მტკიცებულებებით, რომელზეც იყო საუბარი და ბრალდებაც ემყარებოდა კონკრეტულ მტკიცებულებებს, სადაც კონკრეტულად ახსნილია, თუ რატომ არის საქართველო გარეჯის ის მონაკვეთი, რომელიც ამ შემთხვევაში შეიძლება სადაო იყოს. სამწუხაროდ, ამ წუთას არავითარი შესაძლებლობა არ მაქვს, კონკრეტული დანაშაულის ჩადენის ან არჩადენის თაობაზე ვისაუბრო, მაგრამ ის, რაც ჩვენთვის ცნობილი გახდა გამოძიების პროცესიდან ამ მონაკვეთთან დაკავშირებით, მათ შორის ბრალდებულების განმარტება და საგამოძიებო მოქმედებების შედეგად მოპოვებული ინფორმაცია, საქართველოსთვის მკაფიოდ არგუმენტირებულ საფუძველს იძლევა, რომ ის მონაკვეთი რომელზეც ვსაუბრობთ, უნდა ჩაითვალოს საქართველოს სახელმწიფო საზღვრებში შემავალ ტერიტორიად. მოტივაცია, რომ საქმეს პოლიტიკური ელფერი მიეცეს, შეიძლება ჰქონდეს ბრალდებულებსაც და იმ პოლიტიკურ ჯგუფებსაც, რომლის პირობებშიც შეიძლება საქართველოს პოზიციის საწინააღმდეგოდ ცალკეული გადაწყვეტილებების მიღებას ჰქონოდა ადგილი.

გამოძიების დასრულებამდე მათ წარედგინათ ბრალდება, რომელიც გულისხმობს ისეთი დანაშაულის ჩადენას, რომელიც იძლევა იმ შეფასების გაკეთების საშუალებას, რაზეც კითხვას სვამთ და ამ შემთხვევაში ღალატს ახსენებთ – ეს ნამდვილად ასეა, ბრალდება არის ამ შინაარსის, უნდა დაველოდოთ სასამართლოს გადაწყვეტილებას”, – განაცხადა მიხეილ სარჯველაძემ.

პარტია „მოქალაქეების“ ლიდერი ალეკო ელისაშვილი აცხადებს, რომ ივერი მელაშვილისა და ნატალია ილიჩოვას გათავისუფლება მოლაპარაკების შედეგია.

28 იანვარს, ივერი მელაშვილი და ნატალია ილიჩოვა სასამართლო დარბაზიდანვე გათავისუფლდნენ. მათ სასამართლომ გირაო შეუფარდა.

13 იანვარს პროკურატურამ დავით გარეჯის საქმეზე ბრალდებულების, ნატალია ილიჩოვასა​ და ივერი მელაშვილის მიმართ გამოძიება დაასრულა, საქმის არსებითი განხილვა უკვე სასამართლოში გაგრძელდება. 21 იანვარს პროკურატურამ ამავე საქმეზე მოპოვებული ფარული ვიდეო- და აუდიოჩანაწერები გამოაქვეყნა.

7 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისთვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე.

7 ოქტომბერს პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.