ალექსანდრე რაქვიაშვილი ISFED-ზე: ღიად რჩება კითხვა, რამხელა გავლენა იქონია დაუბალანსებელმა ოქმებმა საბოლოო შედეგზე

„სამართლიანმა არჩევნებმა“ ყურადღება გაამახვილა დაუბალანსებელი ოქმების სიმრავლეზე, თუმცა ღიად რჩება კითხვა, რამხელა გავლენა იქონია ამან საბოლოო შედეგზე, - ამის შესახებ „გირჩის“ წევრმა, ალექსანდრე რაქვიაშვილმა „სამართლიანი არჩევნების“ მონაცემების კომენტირებისას განაცხადა.

მისივე შეფასებით, ყველა თანხმდება, რომ არჩევნებზე დარღვევები იყო, თუმცა ოპოზიციამ უნდა დაამტკიცოს ამ დარღვევების მასშტაბი და მათი გავლენა საბოლოო შედეგზე.

„განცხადებიდან მე რა შთაბეჭდილებაც დამრჩა, არის ის, რომ გაურკვევლობა რაღაცნაირად დასრულდეს. ეს უფრო ვრცელი აღწერაა იმ შედეგების, რაც „სამართლიანმა არჩევნებმა“ მიიღო. გადაამოწმეს და დაზუსტებული ინფორმაცია მოგვაწოდეს. არამგონია, პრინციპულად შეიცვალოს ის სიტუაცია, რაც ვიცით. ჩვენ ისედაც ვიცოდით, რომ ძალიან ბევრი დაუბალანსებელი ოქმი და ბევრი შეცდომა იყო, რაც ეჭვებს აჩენდა. ზოგადად, ლეგიტიმურობის კითხვა იმიტომ გაჩნდა, რომ არჩევნები მართლაც ცუდად ჩატარდა. გასაკვირი არ არის, რომ ცესკოსთან პატარა სხვაობა დაჯდა. „ქართული ოცნებისთვის“ „სამართლიანი არჩევნების“ დასკვნაში უფრო პრობლემურია ის, რომ ორგანიზაციამ მორიგ ჯერზე ყურადღება გაამახვილა დაუბალანსებელი ოქმების სიმრავლეზე, თუმცა ღიად რჩება კითხვა, რამხელა გავლენა იქონია ამან საბოლოო შედეგზე. უნდა შევწყვიტოთ გაბუტებული ხალხის პოლიტიკური თამაში და დავიწყოთ მართლა არგუმენტირებული მსჯელობა. მოგვწონს, თუ არ მოგვწონს, შეიძლება ვიღაცამ დაიჯერა, რომ არჩევნები გაყალბდა, ვიღაცამ დაიჯერა, რომ არ გაყალბდა, მაგრამ პარტნიორებს, ელჩებს ხომ უნდა დავუმტკიცოთ რაღაც“, - განაცხადა რაქვიაშვილმა.

მისივე თქმით, ფაქტია, რომ ოპოზიციამ ვერ შეაგროვა ისეთი ხარისხის მტკიცებულება, რაც მათ შორის ჩვენს ფასილიტატორებს ცალსახად დააჯერებდა.

„არავის არ უნდა იმის დამტკიცება, რომ დარღვევები იყო, ყველა ვთანხმდებით ამაში. „ქართული ოცნებაც“ თანხმდება ამაზე, უბრალოდ ჩვენ ვცდებით მასშტაბზე. როგორი იყო მასშტაბი და რა გავლენა იქონია საბოლოო შედეგზე, ეს დასამტკიცებელია“, - განაცხადა რაქვიაშვილმა.

„სამართლიანმა არჩევნებმა“ არჩევნების შემაჯამებელ ოქმებში ცდომილების მაჩვენებელს გადახედა. წინა ანგარიშის თანახმად, ISFED-ი საარჩევნო უბნების ოქმების 8%-ში აღმოჩენილ დისბალანსზე საუბრობდა, ხელახალი დათვლით ორგანიზაციის მონაცემები ცესკოს ოფიციალურ ციფრებს დაუხალოვდა. თუმცა, დღეს პრესკონფერენციაზე აღინიშნა, რომ დისბალანსი საარჩევნო ადმინისტრაციამ უმეტესწილად კენჭისყრის დღის შემდეგ გაასწორა, რაც კითხვებს აჩენს.