მამუკა მდინარაძე: ISFED-ის კონკრეტულმა წარმომადგენლებმა იმისთვის, რომ ორგანიზაციის იმიჯს დარტყმა კიდევ არ მიეღო, დამატებითი შეცდომა დაუშვეს

არ ვაპირებ „სამართლიანი არჩევნების“ (ISFED) კრიტიკას, თამარ სართანიას კარგად ვიცნობ. მას და ორგანიზაციას, მინდა ჩემი პატივისცემა დავუდასტურო, თუმცა ვფიქრობ, რომ ISFED-ის კონკრეტულმა წარმომადგენლებმა, იმისთვის, რომ ორგანიზაციის იმიჯს დარტყმა კიდევ არ მიეღო, დაუშვეს დამატებითი შეცდომა - ამის შესახებ ტელეკომპანია „იმედის“ გადაცემაში „დღის ქრონიკა“ ფრაქცია „ქართული ოცნების“ თავმჯდომარემ, მამუკა მდინარაძემ განაცხადა.

„თავის დროზე, რაც მოხდა იმას შეცდომას ვერ დავარქმევ. ეს იყო შეგნებული გაყალბება მონაცემებისა რომელიც გასწორდა და ISFED-ის მონაცემი დღეს ცესკო-ს მონაცემებს ემთხვევა. მაგრამ მიუხედავად ამისა, ამ 8%-ის გამოტანა მაინც სპეკულაციურად და მანიპულაციად ჩანს. უკვე დავრწმუნდი, რომ იმ მოცემულობის დაუშვებლად, რომ დისბალანსიან ოქმებში მიეთვალათ ის რაც იქვე გასწორდა, ამ მანიპულაციის გარეშე ვერ მოახერხებდნენ ამ 8%-იანი დისბალანსის დადებას, ეს გამორიცხულია“, - აღნიშნა მდინარაძემ.

„სამართლიანმა არჩევნებმა“ არჩევნების შემაჯამებელ ოქმებში ცდომილების მაჩვენებელს გადახედა. წინა ანგარიშის თანახმად, ISFED-ი საარჩევნო უბნების ოქმების 8%-ში აღმოჩენილ დისბალანსზე საუბრობდა, ხელახალი დათვლით ორგანიზაციის მონაცემები ცესკოს ოფიციალურ ციფრებს დაუხალოვდა. თუმცა, დღეს პრესკონფერენციაზე აღინიშნა, რომ დისბალანსი საარჩევნო ადმინისტრაციამ უმეტესწილად კენჭისყრის დღის შემდეგ გაასწორა, რაც კითხვებს აჩენს.