კობახიძე: თვითმმართველობის რეფორმაზე არასამთავრობოებმა არგუმენტები ვერ წარმოადგინეს

სტრასბურგში ოფიციალური ვიზიტით მყოფი საქართველოს პარლამენტის თავმჯდომარე ირაკლი კობახიძე არასამთავრობო ორგანიზაციების პრეზიდენტისადმი მიმართვას ეხმაურება, რომლის თანახმადაც, ორგანიზაციები გიორგი მარგველაშვილს სთხოვენ, რომ კანონპროექტს საქართველოს ადგილობრივი თვითმმართველობის კოდექსში შესატანი ცვლილებების შესახებ ხელი არ მოაწეროს.

"ჩვენ გვქონდა არასამთავრობოებთან შეხვედრა და ვთხოვეთ წარმოედგინათ პრეტენზიები, თუმცა მათ არგუმენტების წარმოდგენა ვერ მოახერხეს. მათი პოზიცია ჩვენთვის, რბილად რომ ვთქვათ, გაუგებარია. ჩვენთვის მოსაწონი ვერ იქნება ასეთი მიმართვა პრეზიდენტისადმი, რომ ვეტო დაადოს კანონს", - განაცხადა კობახიძემ.

30 ივნისს, არასამთავრობო ორგანიზაციებმა, რომლებიც პარლამენტისგან თვითმმართველი ქალაქების სათემო მუნიციპალიტეტებთან გაერთიანების შესახებ დადგენილების გაუქმებას ითხოვენ, პრეზიდენტსაც მიმართას და სთხოვეს, ხელი არ მოაწეროს კანონპროექტს საქართველოს ადგილობრივი თვითმმართველობის კოდექსში შესატანი ცვლილებების შესახებ.

ოპოზიციური სპექტრი თვითმართველობის კოდექსთან დაკავშირებით, არასამთავრობოების პოზიციას იზიარებს „ევროპულ საქართველოს“, „ნაციონალურ მოძრაობას“ და „რესპუბლიკურ პარტიას“ მიაჩნია, რომ გიორგი მარგველაშვილმა კანონს ხელი არ უნდა მოაწეროს.