გიორგი გახარია: ვასრულებთ მუშაობას გეგმაზე, რათა ქვეყანამ პირველი ტურისტების მიღება ზაფხულის დასაწყისში შეძლოს

ჩვენ უკვე ფაქტობრივად ვასრულებთ მუშაობას გეგმაზე, რომელიც შესაძლებლობას მოგვცემს, მშვიდად, გონივრულად და თანმიმდევრულად დავიწყო ნაბიჯების გადადგმა იქით, რომ ქვეყანამ გაზაფხულის ბოლოს, ზაფხულის დასაწყისში შეძლოს პირველი ტურისტების მიღება, - ამის შესახებ საქართველოს პრემიერ-მინისტრმა, გიორგი გახარიამ ჟურნალისტებს განუცხადა.

მას კითხვით მიმართეს შეზღუდვების მოხსნასთან დაკავშირებით.

„არსებული შეზღუდვების სწრაფად მოხსნით არავინაა ისე დაინტერესებული, როგორც საქართველოს მთავრობა და პირადად მე, მაგრამ ყველას კარგად უნდა გვესმოდეს, რომ არასწორი, არაგონივრული და ნაჩქარევი გახსნა არის პირდაპირი მიზეზი იმისა, რომ შემდეგ ისევ დახურვა მოგვიწიოს. ამიტომ, ყველას უნდა გვესმოდეს, რომ აქ ბალანსის დაცვა უაღრესად მნიშვნელოვანია. ჩვენ გვაქვს კონკრეტული გეგმა, რომელსაც მივყვებით. იმის გათვალისწინებით, რომ დღეს ვირუსის გავრცელება ბევრად უფრო მართვადია და ვხედავთ, რომ ამ პროცესს ვმართავთ, შემიძლია გითხრათ, რომ ამ გეგმის ცოტა უფრო სწრაფად განხორციელების შესაძლებლობა გვაქვს.

ასევე მინდა ავღნიშნო, რომ უაღრესად მნიშვნელოვანია სკოლა და მუნიციპალური ტრანსპორტის ამოქმედება. ეს არის ჩვენი პრიორიტეტი. ვაკეთებთ ყველაფერს იმისათვის, რათა შევძლოთ მუნიციპალური ტრანსპორტის ამოქმედება და საკლასო ოთახებში ბავშვების მიყვანა. ეს არის უაღრესად მნიშვნელოვანი, შემდგომ - ეკონომიკის ის დარგები, რომელთაც ჩვენი ეკონომიკისთვის უაღრესი მნიშვნელობა აქვს. კერძოდ, ტურიზმი. ჩვენ უკვე ფაქტობრივად ვასრულებთ მუშაობას გეგმაზე, რომელიც შესაძლებლობას მოგვცემს, მშვიდად, გონივრულად და თანმიმდევრულად დავიწყო ნაბიჯების გადადგმა იქით, რომ ქვეყანამ გაზაფხულის ბოლოს, ზაფხულის დასაწყისში შეძლოს პირველი ტურისტების მიღება. ეს ყველაფერი რეალური და ობიექტურია. ეს ყველაფერი ჩვენ შეგვიძლია გავაკეთოთ, მხოლოდ არ უნდა ვიჩქაროთ მოკლევადიანი, სწრაფი შედეგების მისაღწევად.

ძალიან კარგად მესმის რესტორნების, სასტუმროების, ტურიზმის სფეროში დაკავებული კომპანიების, მაგრამ ჩვენ უნდა ვიზრუნოთ გრძელვადიან შედეგზე. და ეს უნდა გავაკეთოთ ერთად. გამოხატვის თავისუფლება ამ ქვეყანაში აქვს თითოეულ ადამიანს და ვერავინ ვერავის შეუზღუდავს უფლებას, გამოთქვას თავისი აზრი. ეს მათი უფლებაა. ჩვენი პასუხისმგებლობაა, რომ რესტორნებთან, სხვა გასართობ დაწესებულებებთან ერთად ვიფიქროთ ჩვენი მოქალაქეების ჯანმრთელობასა და ეკონომიკის გრძელვადიან გახსნაზე“, - განაცხადა გახარიამ.