აკაკი ბობოხიძე: აიძულო ადამიანები იმუშაონ საკუთარი ნების გარეშე იქ, სადაც მათ არ უნდათ, დიქტატურის გამოხატულებაა

აიძულო ადამიანები იმუშაონ საკუთარი ნების გარეშე იქ, სადაც მათ არ უნდათ, ესეც არის ავტორიტარიზმის, დიქტატურისა და თვითნებურობის გამოხატულება, - ასე აფასებს „ევროპული საქართველოს“ წევრი აკაკი ბობოხიძე იმას, რომ შესაძლოა პარლამენტმა 51 ოპოზიციონერის მანდატი ხვალ არ გააუქმოს.

„ხელისუფლებისგან, რომელმაც მიიტაცა ძალაუფლება, ასევე ველოდები, რომ მიიტაცებს კონკრეტული პიროვნებების ნებას და არ მოუხსნის უფლებამოსილებას“, - აცხადებს ბობოხიძე.

„გირჩი“ „ქართულ ოცნებას“ მოუწოდებს არ დაუჭიროს მხარი ოპოზიონერი დეპუტატებისთვის უფლებამოსილების შეწყვეტის საკითხს. როგორც „გირჩის“ მიერ გავრცელებულ განცხადებაშია ნათქვამი, ოპოზიციისთვის მანდატების გაუქმება მოლაპარაკების პროცესს აზრს დაუკარგავს და კრიზისი, შესაძლოა, შეუქცევადი გახადოს.

საქართველოს პარლამენტი 51 ოპოზიციონერისთვის სადეპუტატო უფლებამოსილების შეწყვეტის საკითხზე მიმდინარე კვირაში იმსჯელებს. 51 ოპოზიციონერი დეპუტატის საკითხი 2 თებერვლის პლენარულ სხდომაზე განიხილება და კენჭი ეყრება.