მაია ცქიტიშვილი: მნიშვნელოვანია, რომ გარეჯის საკითხის პოლიტიზება არ მოვახდინოთ

ძალიან მნიშვნელოვანია, რომ გარეჯის საკითხის პოლიტიზება არ მოვახდინოთ, - ამის შესახებ ვიცე-პრემიერმა, რეგიონული განვითარებისა და ინფრასტრუქტურის მინისტრმა ჟურნალისტებს განუცხადა.

მაია ცქიტიშვილის თქმით, პროკურატურას უნდა მიეცეს საშუალება, რომ საქმე სწორად შეისწავლოს.

„როდესაც ქვეყნის პრეზიდენტი, პრაქტიკულად, მითითებას აძლევს კომისიას და აკეთებს კომენტარს, რა თქმა უნდა, ეს ყოველთვის ახდენს გავლენას კომისიის მუშაობაზე. თუმცა არაერთხელ მქონდა მეც საშუალება კომენტარის გაკეთების, როდესაც გარეჯზე ვსაუბრობთ, ძალიან მნიშვნელოვანია, რომ როგორც უკვე აღვნიშნე, გარეჯის საკითხის პოლიტიზება არ მოვახდინოთ. მაქსიმალურად გავუფრთხილდეთ იმ ჩვენი ქვეყნის უფრო დიდ ინტერესს, რომელიც წარმოადგენს ზოგადად, ქვეყნებს შირის გარეჯის საქართველოს ტერიტორიად შეთანხმებას.

პროკურატურა იძიებს საქმეს, შესაბამისად ამ გამოძიების ფარგლებში უნდა მივცეთ პროკურატურას საშუალება, რომ სრულფასოვნად შეაფასოს, შეისწავლოს საქმე და შესაბამისად, პროკურატურას აქვს უფლება, რომ დაიბაროს ნებისმიერი ადამიანი, დასვას კითხვა, რომელიც ეხება ამ საქმეს. ნებისმიერი ადამიანი, რომელსაც შესაბამისად დავით გარეჯის საქმესთან ან ნებისმიერ სხვა საქმესთან ჰქონდა შეხება, ასევე ჩვენ ყველას, განსაკუთრებით ყოფილ ან არსებულ საჯარო მოხელეებს გვაქვს ვალდებულება, რომ ვუპასუხოთ ყველა კითხვას ზედმეტი პოლიტიზების გარეშე“, – განაცხადა მაია ცქიტიშვილმა.

საქართველოს ყოფილმა პრეზიდენტმა, მიხეილ სააკაშვილმა 2007 წლის მაისში განაცხადა, რომ აზერბაიჯანის პრეზიდენტ ილჰამ ალიევთან ერთად დავით გარეჯის სამონასტრო კომპლექსის საკითხი განიხილა. „ჩვენ შევთანხმდით, რომ უახლოეს პერიოდში ჩვენი სამუშაო ჯგუფები ერთმანეთს შეხვდებიან, საზღვრის ხაზი უნდა გაივლოს ისე, რომ სტრატეგიული სიმაღლე, რომელიც აზერბაიჯანს ქვეყნის შიგნით სჭირდება, აზერბაიჯანის ტერიტორიაში მოყვეს, ხოლო დავით გარეჯის სამონასტრო კომპლექსი მთლიანად საქართველოს სახელმწიფო ტერიტორიაზე უნდა დარჩეს“.

ივერი მელაშვილი და ნატალია ილიჩოვა სასამართლო დარბაზიდანვე გათავისუფლდნენ. მათ სასამართლომ გირაო შეუფარდა.

13 იანვარს პროკურატურამ დავით გარეჯის საქმეზე ბრალდებულების, ნატალია ილიჩოვასა​ და ივერი მელაშვილის მიმართ გამოძიება დაასრულა, საქმის არსებითი განხილვა უკვე სასამართლოში გაგრძელდება. 21 იანვარს პროკურატურამ ამავე საქმეზე მოპოვებული ფარული ვიდეო- და აუდიოჩანაწერები გამოაქვეყნა.