რევაზ სოხაძე: კომპანია GWP საკუთარ მოვალეობებს ვერ ან არ ასრულებს

თბილისის საკრებულოს სხდომაზე ურბანული დაგეგმარების და საქალაქო მეურნეობის კომისიის თავმჯდომარემ რევაზ სოხაძემ კომპანია GWP-ს საკითხზე ყურადღება კიდევ ერთხელ გაამახვილა. მისი განცხადებით, ეს კომპანია საკუთარ მოვალეობებს ვერ, ან არ ასრულებს. დეპუტატმა სხდომაზე კონკრეტული მაგალითები მოიყვანა და ფოტომასალა წარადგინა, რომელთა მიხედვითაც „ჯორჯიან უოთერ ენდ ფაუერი“ არსებულ პრობლემებს ვერ უმკლავდება.

„მე, როგორც ამ ქალაქის მცხოვრებს და ვარკეთილის მაჟორიტარს, შთაბეჭდილება მექმნება, რომ ეს კომპანია ან ვერ ასრულებს, ან არ ასრულებს თავის მოვალეობებს. ორივე შემთხვევაში ეს მისაღები არ არის. მინდა წარმოგიდგინოთ კონკრეტული მაგალითები, საიდანაც ჩანს, რომ წლებია ეს პრობლემა არსებობს და ჯივიპი მათ არ აგვარებს. მაგალითად, ქიზიყის ქუჩაზე უმძიმესი მდგომარეობაა, სადაც წლებია კანალიზაცია ღია წესით მოედინება და მინდორში იღვრება. იგივე მდგომარეობაა მოსკოვის გამზირზე, ბარბარეს უბანში, პატარა ლილოსა და ვარკეთილი 3-ში. ამაზე პასუხისმგებლობა ვინ უნდა აიღოს? ვინ არის პასუხისმგებელი იმაზე, რომ ანტისანიტარიას რომ თავი დავანებოთ, კონკრეტილი კორპუსები ავარიული ხდება?“, - განაცხადა რევაზ სოხაძემ.

საკრებულოს დეპუტატის თქმით, მოყვანილ მაგალითებზე პირდაპირი პასუხისმგებლობა GWP-ს ეკისრება. მისივე განცხადებით, თბილისის საკრებულოს, ზოგადად მუნიციპალიტეტს არაერთგზის ჰქონია კომპანიასთან კომუნიკაცია, თუმცა უშედეგოდ.

„თუ ამ კომპანიის ფუნქცია ის არის, რომ მხოლოდ გადასახადი აკრიფონ, მე ვფიქრობ, რომ მისი ყოფნა არ არის საჭირო. მაინტერესებს, რა გაუმჯობესდა, რაც GWP ოპერირებს თბილისში? კანალიზაციის და წყლის კუთხით წლების განმავლობაში არსებული პრობლემები იგივეა. საბოლოოდ კი, მოსახლეობის გულისწყრომა მუნიციპალიტეტზე მოდის“, - განაცხადა რევაზ სოხაძემ.

როგორც საკრებულოს უმრავლესობის წევრმა განაცხადა, საკრებულოს ყოველ სხდომაზე ეტაპობრივად წარმოადგენს მასალებს, თუ რა არის გასაკეთებელი და რას არ აკეთებს კომპანია GWP.