გიორგი ვოლსკი: ჩვენი მოსახლეობა, უცხოელები, ყველა პირდაპირ ეთერში უყურებდა ინტენსიურ მცდელობას, სამართლებრივი ფორმატიდან პროცესები პოლიტიკურ ჭრილში გადაეტანათ

საზოგადოებაში დესტაბილიზაციისა აღქმა იყო მთავარი ამოცანა და ვფიქრობ, სხვა გზა არც მოსამართლეს დარჩა და არც აღმასრულებელს, რომ სხვა მიმართულებით ემოქმედა, - ამის შესახებ საქართველოს პარლამენტის ვიცე-სპიკერმა, გიორგი ვოლსკიმ ჟურნალისტებს განუცხადა.

მისი თქმით, შემდეგი ნაბიჯი იყო იმის დემონსტრირება, თუ როგორ არ და ვერ მოქმედებს და ჩამოშლილია სახელმწიფო, როდესაც საკითხი ეხება სასამართლო გადაწყვეტილების შესრულებას.

„​ჩვენი მოსახლეობა, უცხოელები, ყველა პირდაპირ ეთერში უყურებდა, როგორ მიმდინარეობდა ინტენსიური მცდელობა სამართლებრივი ფორმატიდან პროცესები გადაეტანათ პოლიტიკურ ჭრილში. უნდა აღვნიშნოთ, რომ მიაღწიეს ამას. შემდეგი ნაბიჯი იყო იმის დემონსტრირება, თუ როგორ არ და ვერ მოქმედებს და ჩამოშლილია სახელმწიფო, როდესაც საკითხი ეხება სასამართლო გადაწყვეტილების შესრულებას. ამასთან დაკავშირებით იმდენად თვალსაჩინოა ყველაფერი, რაც ჩვენ თვალწინ ვითარდებოდა, რომ ამის შესახებ დამატებითი კომენტარები არ შეიძლება გაკეთდეს. არავის დაჭერა არ არის კარგი და მშვიდობის მომტანი, მაგრამ ერთი რამ ყველას უნდა ახსოვდეს, ან არის პროცესი მიშვებული თავის ნებაზე, სოციალურ-ეკონომიკური პრობლემების დამძიმება, ლარის კურსზე დარტყმა და ის პროცესები, რასაც ჯანდაცვა ახერხებს ამ ვითარებაში, ან ინფრასტრუქტურა, ან განათლების სისტემა, ამ ყველაფრის განულება და დაყვანა დაბალ დონეზე. საზოგადოებაში დესტაბილიზაციისა აღქმა იყო მათი მთავარი ამოცანა და ვფიქრობ, სხვა გზა არც მოსამართლეს დარჩა და არც აღმასრულებელს, რომ სხვა მიმართულებით ემოქმედა“, - განაცხადა გიორგი ვოლსკიმ.

„ნაციონალური მოძრაობის“ თავმჯდომარე, ნიკა მელია დააკავეს.

ნიკა მელიას ედავებიან ჯგუფური ძალადობის ხელმძღვანელობას და მასში მონაწილეობას. საქმე ეხება 2019 წლის 20 ივნისს პარლამენტის შენობასთან განვითარებულ მოვლენებს. მაშინ აქციაზე ნიკა მელიამ იქ შეკრებილ ადამიანებს მიმართა, რომ მათი ადგილი პარლამენტს გარეთ არ იყო და ისინი პარლამენტის შენობაში უნდა ყოფილიყვნენ. ამის შემდეგ სიტუაცია დაიძაბა და იქ შეკრებილები სამართალდამცველებს დაუპირისპირდნენ.

2019 წლის 27 ივნისის განჩინებით, ნიკა მელიას აღკვეთის სახით 30000-ლარიანი გირაო შეეფარდა, მაშინ პარლამენტმა მას დეპუტატის იმუნიტეტი პირველად მოუხსნა და სასამართლოს განჩინება აღსრულდა. მან პირველ ჯერზე გადაიხადა 30000 ლარი, თუმცა მას შემდეგ რაც, 2020 წლის 1-ელ ნოემბერს პარლამენტთან აქციაზე ელექტრონული სამაჯური დემონსტრაციულად მოიხსნა, გენერალურმა პროკურატურამ კიდევ ერთხელ მიმართა სასამართლოს, რათა ნიკა მელიას გირაოს სახით 100 000 ლარი შეფარდებოდა, თუმცა სასამართლომ 40 000 ლარი განუსაზღვრა, რომელიც მან არ გადაიხადა.

ნიკა მელიას თბილისის საქალაქო სასამართლომ აღკვეთის ღონისძიებად პატიმრობა 17 თებერვალს შეუფარდა. მეორე დღეს, 18 თებერვალს, გიორგი გახარიამ პრემიერ-მინისტრის თანამდებობა დატოვა. ამასთან დაკავშირებით კი, შინაგან საქმეთა სამინისტრომ მელიას საქმეზე დაგეგმილი ღონისძიება დროებით გადადო.

22 თებერვალს, მეათე მოწვევის პარლამენტმა ირაკლი ღარიბაშვილის მთავრობას ნდობა გამოუცხადა.