ფრიდონ ინჯია: ნიკა მელიამ გირაო არ გადაიხადა და სხვა გამოსავალი არ იყო

ბოლო წუთამდე ვფიქრობდი, რომ ნიკა მელია გადაიხდიდა გირაოს, არ გადაიხადა და სხვა გამოსავალი აქ არ იყო, - ამის შესახებ „ევროპელი სოციალისტების“ წევრმა, დეპუტატმა ფრიდონ ინჯიამ განაცხადა.

მისივე თქმით, როგორიც არ უნდა იყოს სასამართლოს გადაწყვეტილება, ის ყველა დემოკრატიულ ქვეყანაში უნდა შესრულდეს, თუ გაბათილებული არ არის.

„ქართველი კაცის დაპატიმრება ვის გაუხარდება? საქართველოში ალბათ არავის, მაგრამ ამ შემთხვევაში, მაინც იმედი მქონდა, რომ ნიკა მელია გადაიხდიდა იმ გირაოს, რადგან ერთხელ უკვე გადაიხადა. მეჩვენება, რომ ის თავის თამაშს არ თამაშობდა. ბოლო წუთამდე ვფიქრობდი, რომ გადაიხდიდა გირაოს, არ გადაიხადა და სხვა გამოსავალი აქ არ იყო. რა თქმა უნდა, პასუხისმგებლობა არის მთლიანად „ქართულ ოცნებაზე“ და ამ შემთხვევაში იყო სასამართლოს გადაწყვეტილება. როგორიც არ უნდა იყოს სასამართლოს გადაწყვეტილება, ყველა დემოკრატიულ ქვეყანაში უნდა შესრულდეს, თუ გაბათილებული არ არის. მას აქვს ყველანაირი უფლება ადვოკატის მეშვეობით, რომ ითანამშრომლოს გამოძიებასთან. იმედი მაქვს, თანამშრომლობის შემთხვევაში, შეღავათიც ექნება, თუ რამე დანაშაული აქვს, მაგრამ ასეთ დანაშაულებზე, როგორც პრაქტიკამ აჩვენა, გინდაც ამერიკის შეერთებულ შტატებში მკაცრი ზომები მიიღეს“, - განაცხადა ფრიდონ ინჯიამ.

დღეს „ნაციონალური მოძრაობის“ თავმჯდომარე, ნიკა მელია დააკავეს.

ნიკა მელიას ედავებიან ჯგუფური ძალადობის ხელმძღვანელობას და მასში მონაწილეობას. საქმე ეხება 2019 წლის 20 ივნისს პარლამენტის შენობასთან განვითარებულ მოვლენებს. მაშინ აქციაზე ნიკა მელიამ იქ შეკრებილ ადამიანებს მიმართა, რომ მათი ადგილი პარლამენტს გარეთ არ იყო და ისინი პარლამენტის შენობაში უნდა ყოფილიყვნენ. ამის შემდეგ სიტუაცია დაიძაბა და იქ შეკრებილები სამართალდამცველებს დაუპირისპირდნენ.

2019 წლის 27 ივნისის განჩინებით, ნიკა მელიას აღკვეთის სახით 30000-ლარიანი გირაო შეეფარდა, მაშინ პარლამენტმა მას დეპუტატის იმუნიტეტი პირველად მოუხსნა და სასამართლოს განჩინება აღსრულდა. მან პირველ ჯერზე გადაიხადა 30000 ლარი, თუმცა მას შემდეგ რაც, 2020 წლის 1-ელ ნოემბერს პარლამენტთან აქციაზე ელექტრონული სამაჯური დემონსტრაციულად მოიხსნა, გენერალურმა პროკურატურამ კიდევ ერთხელ მიმართა სასამართლოს, რათა ნიკა მელიას გირაოს სახით 100 000 ლარი შეფარდებოდა, თუმცა სასამართლომ 40 000 ლარი განუსაზღვრა, რომელიც მან არ გადაიხადა.

ნიკა მელიას თბილისის საქალაქო სასამართლომ აღკვეთის ღონისძიებად პატიმრობა 17 თებერვალს შეუფარდა. მეორე დღეს, 18 თებერვალს, გიორგი გახარიამ პრემიერ-მინისტრის თანამდებობა დატოვა. ამასთან დაკავშირებით კი, შინაგან საქმეთა სამინისტრომ მელიას საქმეზე დაგეგმილი ღონისძიება დროებით გადადო.

22 თებერვალს, მეათე მოწვევის პარლამენტმა ირაკლი ღარიბაშვილის მთავრობას ნდობა გამოუცხადა.