„ევროპელი სოციალისტები“: ჩვენი უმთავრესი ამოცანა მმართველი ძალისთვის მაქსიმალურად ჯანსაღი ოპონირების გაწევაა

პოლიტიკური პარტია „ევროპელი სოციალისტები“ განცხადებას ავრცელებს, რომელშიც აღნიშნულია, რომ განაგრძობენ ხელისუფლების ოპონირებას კონსტრუქციულ ჭრილში.

„ჩვენი უმთავრესი ამოცანაა, მმართველ ძალას გავუწიოთ მაქსიმალურად ჯანსაღი ოპონირება ყველა იმ მნიშვნელოვან საკითხთან დაკავშირებით, რაც დღეს დგას ქვეყნის წინაშე და არის სახელმწიფოსთვის ძირითადი გამოწვევა“, - აღნიშნულია განცხადებაში.

პარტია განმარტავს, რომ მნიშვნელოვანია, საარჩევნო კოდექსში ძირეული ცვლილებების განხორციელება, მომავალი არჩევნების უფრო გამჭვირვალედ და კონკურენტუნარიან გარემოში ჩასატარებლად.

„საფიქრალია, ელექტრონულ სისტემაზე გადასვლა და ვინ განახორციელებს ამის პროგრამულ უზრუნველყოფას? ეს უნდა იყოს საქართველოს და საერთაშორისო თანამეგობრობის მხრიდან ერთობლივად აღიარებული“, - აცხადებენ პარტიაში.

„ევროპელი სოციალისტები“ აცხადებს, რომ სერიოზული პრობლემები არსებობს განათლების დარგში და კერძოდ, მეცნიერებათა აკადემიაში.

„მიგვაჩნია, რომ ხელისუფლების მხრიდან ეს მაქსიმალურ მხარდაჭერას საჭიროებს. აუცილებელია მკვეთრად გაიზარდოს მეცნიერებათა აკადემიის როლი მეცნიერებისა და თანამედროვე ტექნოლოგიების განვითარების თვალსაზრისით, რათა დაიბრუნოს ის სტატუსი და როლი, რომელიც მას ჰქონდა ოდითგანვე და იყო საქართველოს განათლების სიმბოლო“, - აღნიშნულია განცხადებაში.

პარტია განმარტავს, რომ სერიოზული პრობლემები არსებობს სოფლის მეურნეობის დარგში, რაც, უპირველესად, გამოიხატება სოფლების დაცლასა და ქვეყნის უმნიშვნელოვანესი შრომითი რესურსის ქვეყნიდან გადინებაში.

„ამის აღდგენა, პრაქტიკულად, შეუძლებელია. აუცილებელია, ამ პრობლემების მიმართ ხელისუფლებამ და მმართველმა პარტიამ მიიღოს რადიკალური ზომები, რაც ასევე შეიძლება გამოიხატოს საკადრო პოლიტიკაში ცვლილებებით“, - აცხადებენ პარტიაში.

განცხადებაში ასევე აღნიშნულია, რომ კომუნიკაციების ეროვნულ მარეგულირებელ კომისიაში სამართლებრივი გადაცდომები არსებობს, რომელიც საჭიროებს დაუყონებლივ რეაგირებას სახელმწიფოს მხრიდან.

„ის ზარალი, რომელსაც აყენებს აღნიშნული კომისია სახელმწიფოს ბიუჯეტს დღეს და ჩვენი ინფორმაციით, მიაყენებს მომავალში, არის საყურადღებო. სახელმწიფო არ ატარებს ქმედით ნაბიჯებს და თითქოს ვერ ხედავს არსებულ პრობლემებს. პარტიის თავმჯდომარის, ფრიდონ ინჯიას მხრიდან, ამასთან დაკავშირებით გაკეთდა არაერთი მწვავე განცხადება და ვფიქრობთ, საზოგადოების მხრიდან ნამდვილად არსებობს ინტერესი მეტი გამჭვირვალობა მოეფინოს კომისიაში არსებულ მდგომარეობას“, - აღნიშნულია განცხადებაში.

პარტია ასევე განმარტავს, რომ აუცილებელია, თვითმმართველობის შესახებ კანონში ცვლილებების გატარება, რადგან არსებული კანონი არის არაეფექტური და შეუსაბამობაშია ქვეყნის სოციალურ-ეკონომიკურ მდგომარეობასთან.

„ეს მხოლოდ ის მცირე ჩამონათვალია, იმ მრავალი სხვა საკითხიდან, რომელსაც ჩვენ ვთვლით აუცილებლად გადასაწყვეტად. ამასთანავე, ჩვენ სრულიად ვეთანხმებით და მხარს ვუჭერთ იმ ხაზს, რომელიც უკვე გაჟღერდა მმართველი პარტიის მხრიდან, მედიატორის ჩართულობით გამართული მოლაპარაკებების დამთავრების შემდეგ. კერძოდ, ეს არის: კანონის უზენაესობა; სამართლებრივი სახელმწიფოს შენება და ქვეყნის ინტერესებიდან გამომდინარე, შესაბამის ქმედებები. დროა, ხელისუფლებამ აუცილებელ საქმეს მოკიდოს ხელი, რასაც ჰქვია ქვეყნის რთული ეკონომიკური კრიზისიდან გამოყვანა, რაც უდავოდ შექმნა და გააღრმავა პანდემიამ და დესტრუქციული ძალების მოქმედებამ“, - აღნიშნულია პარტიის განცხადებაში.