სერგო ჩიხლაძე: დარწმუნებული ვარ, ყველა მხარე მოვძებნით ძალებს, რომ საბოლოო ჯამში მივიდეთ შეთანხმებამდე

პოზიტიური არის მოლოდინი, ასე რომ არ იყოს მხარეები მოლაპარაკებებზე არ შევიდოდნენ, - ამის შესახებ სერგო ჩიხლაძემ „იმედის ფაქტორში“ განაცხადა. „სტრატეგია აღმაშენებლის“ ლიდერის თქმით, შეთანხმების მიღწევა აუცილებელია, რადგან წინააღმდეგ შემთხვევაში ქვეყანაში არსებული სხვა პრობლემების მოგვარება რთული იქნება.

„მგონი ყველა ვთანხმდებით, რომ თუ ეს პოლიტიკური კრიზისი არ მოგვარდა, ჩვენ ვერც კორონა-კრიზისს მოვერევით, ვერც ეკონომიკურ კრიზისს, ვერც სამუშაო ადგილებს შევინარჩუნებთ. ამიტომ ეს პირველი ბარიერი უნდა გადავლახოთ. შეთანხმება უნდა შედგეს ხუთივე პუნქტზე. ეს განსაზღვრული ე.წ. ჩარჩოთი, რომელზეც ყველა შევთანხმდით. ოღონდ კიდევ ერთხელ მინდა განვმარტო, რომ აქ არ იგულისხმება ის, რომ რომელიმე პუნქტში ვიღაც აბსოლუტური ნულით, ვიღაც კი 100%-ით დარჩეს. ეს უნდა იყოს შეთანხმება ამ საკითხებზე, გონივრული კომპრომისები. დარწმუნებული ვარ, ყველა მხარე მოვძებნით ძალებს, რომ საბოლოო ჯამში მივიდეთ შეთანხმებამდე“, - განაცხადა სარჯველაძემ.

მისივე თქმით, „სტრატეგია აღმაშენებლის“ მოლოდინია, რომ გადაწყვეტილება ხუთივე საკითხზე იქნება შემოთავაზებული, რომლებიცაა: პოლიტიკური დევნის შეწყვეტა, მართლმსაჯულების თემა, საარჩევნო სისტემა, ვადამდელი არჩევნები ან მასთან მისასვლელი გზა და პოლიტიკური ძალაუფლების განაწილების საკითხები.

კრისტიან დანიელსონი მმართველ პარტიასა და ოპოზიციურ სპექტრს გაერთიანებულ ფორმატში ხვდება.

დანიელსონის მედიაციით მმართველ გუნდსა და ოპოზიციას შორის მოლაპარაკებების პირველი რაუნდი 12-19 მარტს გაიმართა. 22 მარტს კი შარლ მიშელმა განაცხადა, რომ კრისტიან დანიელსონი საქართველოში მედიაციას გააგრძელებს.