შალვა პაპუაშვილის განცხადებით, ამნისტიის შესახებ კანონპროექტზე მუშაობა საპატიმროდან ნიკა მელიას გირაოთი გამოსვლის შემთხვევაშიც გაგრძელდება

პარლამენტის განათლების კომიტეტის თავმჯდომარე, შალვა პაპუაშვილი „იმედინიუსთან“ საუბრისას განმარტავს, რომ იმ შემთხვევაშიც კი, თუ ნიკა მელია დათანხმდება ევროკავშირის მხრიდან გირაოს გადახდას და ამ ფორმით დატოვებს საპატიმრო დაწესებულებას, ამნისტიის კანონპროექტზე მუშაობა მაინც გაგრძელდება.

„შეთანხმება ორი ნაწილისგან შედგებოდა: ერთი ეხება მის რაც შეიძლება სწრაფად გამოსვლას სასჯელაღსრულების დაწესებულებიდან - ესაა აღკვეთის ღონისძიების საკითხი, რათა დატოვოს საპატიმრო. მეორე საკითხია ის, რომ ზოგადად, ამნისტია შეეხება იმ სისხლის სამართლის საქმეებს, რომელიც, მათ შორის, ნიკა მელიას წინააღმდეგაც არსებობს და შემოთავაზებას, რომელიც ჩვენი დასავლელი პარტნიორებისგან და მედიატორებისგან მოდიოდა, რომ ჩვენი უახლოესი წარსულის ეს გვერდი გადავფურცლოთ. ამიტომ, ჩვენ გვრჩება პასუხისმგებლობა და ვალდებულება, რომ ამნისტიის შესახებ კანონი მივიღოთ“, - აღნიშნა შალვა პაპუაშვილმა.

მან „ნაციონალური მოძრაობის“ წარმომადგენელთა მიერ ამნისტიის კანონპროექტის შესახებ გაკეთებულ განცხადებებსაც უპასუხა და აღნიშნა, რომ ამ საკითხის გადაწყვეტა ამ პოლიტიკურ პარტიას არ ეხება.

„ნაციონალური მოძრაობის“ განსამარტი არაა, ვისზე უნდა გავრცელდეს ეს კანონი და ვისზე - არა. მათ ამ შეთანხმებაზე ხელი არც მოუწერიათ. ეს გახლავთ შარლ მიშელის შემოთავაზება, რომლის სულისკვეთებაც პოლარიზაციის დასრულებაა. ეს დღე, 20 ივნისი საზოგადოების სხვადასხვა ჯგუფში სხვადასხვაგვარად აღიქმება და აქედან გამომდინარე, ხელს უწყობს პოლარიზაციასა და გარკვეულ დაპირისპირებას. შემოთავაზება იყო, რომ გადაგვეფურცლა ეს გვერდი, გამოგვეცხადებინა ამნისტია ამ დღესთან დაკავშირებით, ყველა სისხლის სამართლის საქმეზე. ამ შეთანხმების მთავარი არსი არის ის, რომ პოლარიზაციიდან თანამშრომლობაზე გადავიდეთ. ამნისტია გახლავთ, ამ მთლიან სურათში, ერთი ნაბიჯი“, - განაცხადა შალვა პაპუაშვილმა.

მომდევნო კვირაში, არაუგვიანეს სამშაბათისა, საქართველოს პარლამენტში ამნისტიის შესახებ კანონპროექტი უნდა დაინიცირდეს. პლენარულ სხდომაზე, შეთანხმებაზე ხელმომწერი დეპუტატების მისვლის შემდეგ, პრეზიდენტი გამოსცემს გიორგი რურუას შეწყალების აქტს.