ირაკლი კობახიძე: შარლ მიშელის დოკუმენტს ვინც უპირისპირდება, ამ დოკუმენტის პრივილეგიით არ უნდა ისარგებლოს

შარლ მიშელის დოკუმენტს ვინც უპირისპირდება, ამ დოკუმენტის პრივილეგიით არ უნდა ისარგებლოს – ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა.

მისი თქმით, მთავარი ამოსავალი წერტილი უნდა იყოს, შარლ მიშელის დოკუმენტი, სადაც მარტივად წერია, რომ ამნისტიის შესახებ კანონი ყველას უნდა შეეხოს.

„გუშინ შეხვედრაზე პარლამენტის თავმჯდომარის მხრიდან კითხვა დაისვა, თუ რა შემთხვევაში დაუჭერდა მხარს ამნისტიის შესახებ კანონპროექტს ოპოზიცია. ეს არ იყო ინიციატივა, კითხვა იყო დასმული. ამაზეც კი უარყოფითი პასუხი მიიღო, რაც არასწორია. ვისგან მიიღო უარი, დეტალები არ ვიცი, შეხვედრას არ ვესწრებოდი.

ჩვენთვის მთავარი ამოსავალი წერტილი უნდა იყოს, შარლ მიშელის დოკუმენტი. დოკუმენტში მარტივი რამე წერია, ყველას უნდა შეეხოს ამნისტიის შესახებ კანონი. ამის მიუხედავად, გარკვეულ გამონაკლისებს მაინც ვუშვებთ, თუ საქმე ეხება ისეთ დანაშაულებს, როგორიცაა სხეულის განზრახ დაზიანება, წამება და არაადამიანური მოპყრობა. ასეთ შემთხვევაში, ამნისტია არ გავრცელდება იმ პირებზე, ვინც ასეთი დანაშაული ჩაიდინა.

რაც შეეხება ზოგად სულისკვეთებას, ის იყო, რომ „ამნისტიის შესახებ“ კანონი პრინციპულად ყველა პირზე უნდა გავრცელებულიყო, რაც ასახულია ჩვენს დოკუმენტში. ვინმე პრინციპულად თუ უპირისპირდება ევროკავშირს, მიშელის შეთანხმებას და ამნისტიის შესახებ კანონპროექტს, ამ შემთხვევაში ლოგიკურია, რომ მასზე არ უნდა გავრცელდეს „ამნისტიის შესახებ“ კანონპროექტის მოქმედება. ეს არის მარტივი პრინციპი, რაც მიშელის დოკუმენტიდან გამომდინარეობს. ვინც მიშელის დოკუმენტს უპირისპირდება, მან არ უნდა ისარგებლოს ამ დოკუმენტის პრივილეგიით“, – განაცხადა ირაკლი კობახიძემ.

პარლამენტმა „ქართული ოცნების“ მიერ მომზადებული „ამნისტიის შესახებ“ კანონპროექტი პირველი მოსმენით მიიღო.

პარლამენტის თავმჯდომარემ კოლეგებს უმრავლესობიდან შესთავაზა დოკუმენტის მათი ვერსიიდან ამოიღონ ჩანაწერი ამნისტიაზე თანხმობასთან დაკავშირებით, ოპოზიციას კი სთავაზობს უარი თქვას ჩანაწერზე დაზარალებულის თანხმობის შესახებ.