გიორგი ბოტკოველი: ბოიკოტი არ ყოფილა შეცდომა

ბოიკოტი შეცდომა არ ყოფილა. ბოიკოტი იყო ის, რამაც ძალიან ბევრი რამ მოუტანა ქვეყანას, თუნდაც ის დიდი საერთაშორისო მხარდაჭერა, რომელსაც ჩვენ დღეს ვგრძნობთ, - ამის შესახებ გიორგი ბოტკოველმა განაცხადა. „ნაციონალური მოძრაობის“ წევრმა ასევე განმარტა, რატომ აცხადებს პარტია 19 აპრილის შეთანხმების ხელმოწერაზე უარს.

„მე პირადად მყავს გაკრიტიკებული ის ადამიანები, ვინც ხელი მოაწერა იმ ხელშეკრულებას და შევიდა პარლამენტში, მაგრამ ვფიქრობთ, რომ ჩვენ უფრო მეტი უნდა გვემუშავა ერთად და უფრო მეტი უნდა გვეზრუნა იმისთვის, რომ მეტი გამოგვეგლიჯა ხელისუფლებისთვის. სწორედ ამიტომ არ ვაწერთ ხელს - ჩვენი არგუმენტი ორ მთავარ პრინციპს ემყარება. ეს არის ის, რომ ჩვენ არ ვეთანხმებით ამნისტიის კანონპროექტს, რომელიც ჯალათების შეწყალებას ემსახურება და არ ვეთანხმებით იმას, რომ მოვაწეროთ ხელი ხელშეკრულებას, რომლის დარღვევაც უკვე დაიწყო „ქართულმა ოცნებამ“ და ჩვენ გვაქვს რამდენიმე დღის წინ სასამართლოების მაგალითი“, - განაცხადა ბოტკოველმა.

„ერთიანი ნაციონალური მოძრაობა“ პარლამენტში შედის. ამის შესახებ გადაწყვეტილება პარტიამ პოლიტსაბჭოს სხდომაზე მიიღო. თუმცა, „ნაციონალური მოძრაობა“ ევროპული საბჭოს პრეზიდენტის, შარლ მიშელის მედიაციით გაფორმებულ შეთანხმებას ხელს არ აწერს.