ალუდა ღუდუშაური: გიორგი გახარიასა და მისი გუნდის მოქმედება სინქრონშია „ნაციონალურ მოძრაობასთან“

ბიძინა ივანიშვილს მოუწია განცხადების გაკეთება იმ მარტივი მიზეზიდან გამომდინარე, რომ უკვე მასშტაბური ხასიათი მიიღო გახარიასა და მისი გუნდის წევრების მიერ ირიბად თუ პირდაპირ იმის მტკიცებამ, რომ აფილირებული არიან „ქართულ ოცნებასთან, - ამის შესახებ საპარლამენტო უმრავლესობის წევრმა, ალუდა ღუდუშაურმა განაცხადა.

მისი თქმით, გახარიასა და მისი გუნდის მოქმედება სინქრონშია „ნაციონალურ მოძრაობასთან“.

„გახარიასა და მისი გუნდის მოქმედება სინქრონშია „ნაციონალურ მოძრაობასთან“. ამიტომ როგორც ჩანს, ბატონ ბიძინასაც მოუწია, ეს განცხადება გაეკეთებინა. საჭიროდ ჩათვალა, რომ მკაფიოდ გაევლო ხაზი. დიახ, გახარიას მოქმედება, როდესაც მან პრემიერის პოსტი დატოვა, გუნდისთვის ღალატის ტოლფასი იყო. ეს არის მკაფიო და ყველასთვის ცხადზე ცხადი“, - განაცხადა ალუდა ღუდუშაურმა.

მისივე თქმით, გახარია და მისი გუნდი მათივე ქმედებების გამო უხერხულ მდგომარეობაში არიან.

„ძალიან უხერხულ მდგომარეობაშია თვითონ გახარია და მისი გუნდიც მათ მიერ გაკეთებული განცხადებებისა და განსაკუთრებით მათი მოქმედებებით. ამიტომ ბუნებრივია, ცდილობენ, გადაფარონ თავიანთი მოქმედება, რომელიც პირდაპირ კორელაციაშია „ნაციონალურ მოძრაობასთან“. გახარიას გადადგომა დაკავშირებული იყო „ნაციონალური მოძრაობის“ ფორმალურ ბრალდებულ მმართველთან, ნიკა მელიასთან. როდესაც ქვეყნის საჭიროებებსა და გამოწვევებს სასწორის ერთ პინაზე დებ და ამავე დროს, სასწორის ერთ პინაზე დებ „ნაციონალური მოძრაობის“ ფორმალური ხელმძღვანელის, ბრალდებულ ნიკანორ მელიას ინტერესებს, ამით პრაქტიკულად ყველაფერია ნათქვამი. გახარია უარს ამბობდა სასამართლოს კანონიერი გადაწყვეტილების აღსრულებაზე. გახარიას პოზიცია იმთავითვე, როდესაც მან გადაგომის განცხადება გააკეთა, როგორც ჩანს, პირდაპირ ნაკარნახევი იყო „ნაციონალური მოძრაობის“ ინტერესებიდან გამომდინარე. სხვა შემთხვევაში, როგორ აიხსნება ის გარემოება, რომ ქვეყნის პრემიერ-მინისტრი ტოვებს თანამდებობას იმიტომ, რომ სასმართლოს კანონიერი გადაწყვეტილება არ აღასრულოს“, - განაცხადა ალუდა ღუდუშაურმა.

თებერვალში გახარიას ქმედება იყო საკუთარი გუნდისა და სახელმწიფოს ღალატი, - ამის შესახებ ბიძინა ივანიშვილის განცხადებაშია ნათქვამი, რომელიც დღეს გავრცელდა.