სალომე სამადაშვილი: ევროკომისიის პოლიტიკა მიმართული უნდა იყოს ორი გზით - რუსეთზე ზეწოლა და ამ ქვეყნების დახმარება

საქართველოს ხელისუფლებას ჯერ კიდევ დიდი ხნის წინ უნდა დაეყენებინა საერთაშორისო დღის წესრიგში სანქციების საკითხი, 2008 წლის ცეცხლის შეწყვეტის ხელშეკრულების შეუსრულებელი ვალდებულებების გამო, - ამის შესახებ ფრაქცია „ლელოს“ წევრმა, სალომე სამადაშვილმა განაცხადა.

„რაც შეეხება ევროკომისიის პოლიტიკას, პოლიტიკა უნდა იყოს მიმართული ორი გზით, ერთი არის რუსეთზე ზეწოლა და მეორე მხრივ დახმარება ამ ქვეყნებისთვის, იმისთვის, რომ ჩვენ გავატაროთ რეალური რეინტეგრაციის პოლიტიკა. ამ თვალსაზრისით მნიშვნელოვანია, რომ პარტნიორი, შესაბამისად ხელისუფლების წარმომადგენლები უნდა იყვნენ მოტივირებული, შესაბამისი შედეგის მისაღებად, რაც სამწუხაროდ უკრაინის შემთხვევაში ვხედავთ, რომ ბევრად უფრო აქტიურად მუშაობს უკრაინის დიპლომატიური სამსახური, ვიდრე ჩვენი დღევანდელი ხელისუფლება“, - განაცხადა სალომე სამადაშვილმა.

გაერო-ს გენერალურმა ასამბლეამ 75-ე სესიის ფარგლებში მიიღო საქართველოსა და მსოფლიოს სხვადასხვა რეგიონის 56 ქვეყნის მიერ ინიცირებული რეზოლუცია - „აფხაზეთიდან, საქართველო და ცხინვალის რეგიონიდან/სამხრეთ ოსეთი, საქართველო იძულებით გადაადგილებულ პირთა და ლტოლვილთა სტატუსის შესახებ“.