თამარ ჟვანია: დღემდე არავის წარმოუდგენია რაიმე მტკიცებულება, რომელიც გადადგომის საფუძველი გახდებოდა

დღემდე არავის წარმოუდგენია რაიმე მტკიცებულება, რომელიც გადადგომის საფუძველი გახდებოდა, - ამის შესახებ ცენტრალური საარჩევნო კომისიის თავმჯდომარემ, თამარ ჟვანიამ მისი გადადგომის მოთხოვნასთან დაკავშირებით განაცხადა.

მისი თქმით, ძალიან მნიშვნელოვანი პასუხისმგებლობა იყო, მათ შორის საარჩევნო ადმინისტრაციის და პირადად მისი, როგორც ხელმძღვანელი პირის, რომ პასუხი გაეცა ყველა იმ კითხვაზე, რომელიც საგამოძიებო კომისიას ჰქონდა.

„იყო საკმაოდ მნიშვნელოვანი, არსებითი და კრიტიკული კითხვები, რომლებიც უკავშირდებოდა პირველ რიგში საუბნო საარჩევნო კომისიების კომპეტენციას, ჩატარებულ ტრენინგებს, იმ შეცდომებს და გარკვეულ ხარვეზებს, რომლებიც ოქმებში იყო დაფიქსირებული. კითხვები უკავშირდებოდა დავების პროცესს და ოქმის შევსებასთან დაკავშირებულ საკითხებს.

დავეთანხმე კომისიას, რომელმაც ძალიან დიდი შრომა გასწია, რომ რეალურად არჩევნებზე ნამდვილად იყო გარკვეული ტიპის ხარვეზები და პროცედურული სახის შეცდომები, თუმცა აქ არაფერი იყო ახალი, განსხვავებული, რაც წინა არჩევნებზე არ ყოფილა. უბრალოდ, სხვადასხვა მიზეზიდან გამოწვეული მასშტაბებია განსხვავებული. ეს მიზეზები უკავშირდება ზოგადად პოლიტიკურ გარემოს, ძალიან რთულ, კომპლექსურ ვითარებაში მუშაობას. ამავდროულად, სუბიექტების უპრეცედენტოდ მაღალ რაოდენობას, და რაც მთავარია, პანდემიას, რომელმაც ძალიან ბევრი თავის ტკივილი გაუჩინა საარჩევნო ადმინისტრაციას არჩევნების ადმინისტრირების პროცესში.

ვრცელდებოდა და დღესაც ვრცელდება მოთხოვნა პირადად ჩემი, როგორც ცენტრალური საარჩევნო კომისიის თავმჯდომარის მიმართ, რომ უმჯობესი იყო, წავსულიყავი. არჩევნების დასრულებისთანავეც იდგა ეს მოთხოვნა. მინდა, ამაზე ცალსახად განვაცხადო, არც საარჩევნო დავების პროცესში ცენტრალურ საარჩევნო კომისიაში და მათ შორის არც საგამოძიებო კომისიაში დღეის მდგომარეობით არცერთი დასაბუთება, არგუმენტი და მტკიცებულება არ შემოსულა“, - განაცხადა თამარ ჟვანიამ.

მისი თქმით, არცერთი პოლიტიკური პარტიის გადასაწყვეტი არ არის, დამოუკიდებელი საარჩევნო ორგანოს ხელმძღვანელი გადადგება თუ არა.

„მქონდა მოლოდინი, რომ ვინმე რამეს მოიტანდა, სამწუხაროდ, არ არსებობს. რა საფუძვლით შეიძლება მოითხოვოს რომელიმე პოლიტიკურმა პარტიამ ან სუბიექტმა ნებისმიერი ადმინისტრატორის გადადგომა, იქნება ეს ცესკო-ს თავმჯდომარე, თუ საოლქო კომისიის თავმჯდომარე? ჩვენი პასუხი ასეთია – ჩვენ გვაქვს არგუმენტები, ჩვენ უკან დგას სიმართლე და არც ერთი პოლიტიკური პარტიის ან მისი წარმომადგენლის გადასაწყვეტი არ არის, დამოუკიდებელი საარჩევნო ორგანოს წევრი, თუ ხელმძღვანელი გადადგება თუ არა.

ამას უნდა ჰქონდეს შესაბამისი მტკიცებულება და დასაბუთება, უნდა ჰქონდეს საკმარისი არგუმენტები. იმ პირობებში, როდესაც არგუმენტები და დასაბუთება წარმოდგენილი არ არის, როდესაც საერთაშორისო ორგანიზაციებმა არჩევნები ლეგიტიმურად შეაფასეს, მე მიმაჩნია, რომ ნებისმიერი შემდეგი ადმინისტრატორისთვის, რომელიც შეიძლება იყო ცესკო-ს ან საოლქო საარჩევნო კომისიის ხელმძღვანელი, ძალიან ცუდი მესიჯი იქნებოდა, რომ პოლიტიკური მოთხოვნის და სურვილის გამო, ვინმე წავიდეს. ადამიანები თანამდებობებს შეიძლება ტოვებდნენ საფუძვლის, მტკიცებულებების და არა პოლიტიკური სურვილების შედეგად“, - განაცხადა თამარ ჟვანიამ.

თამარ ჟვანიამ არჩევნების შემსწავლელი დროებითი საგამოძიებო კომისიის წევრების კითხვებს უპასუხა.