ირაკლი კობახიძე თბილისში განვითარებულ მოვლენებზე: ამ პროვოკაციის უკან „ნაცმოძრაობის“ აქტივისტები - მაქარაშვილები და სხვები იყვნენ

პარტია „ქართული ოცნების“ თავმჯდომარის, ირაკლი კობახიძის განცხადებით, ის, რაც დღეს დედაქალაქში ხდებოდა, „ნაცმოძრაობის“ ინტერესებშია.

„ჩვენ ვხედავდით, ვინ ინგა ამ პროვოკაციის უკან - „ნაცმოძრაობის“ ცნობილი აქტივისტები, მაქარაშვილები და ა.შ. სხვათა შორის, მათ თავიანთი კვალი აქვთ რუსეთისკენ. ესეც ძალიან კარგად იცის საზოგადოებამ. ძალიან კარგად იკვეთება კავშირები ამ რადიკალურ ოპოზიციასა და რუსეთს შორის. რაც დღეს ტბილისში ხდებოდა, პირველ რიგში, არის სწორედ იმ ძალების ინტერესებში, რომელთაც არ უნდათ სიკეთე საქართველოსთვის. ძალიან კარგად ვიცით, რომ საქართველოში ეს პოლიტიკური ძალა „ნაცმოძრაობაა“. სწორედ ამიტომ იყვნენ ამ პროვოკაციის უკან „ნაცმოძრაობის“ აქტივისტები - მაქარაშვილები და სხვები. ეს კვალი იმდენად თვალსაჩინოა, რომ ამას დამატებითი განმარტებებიც კი არ სჭირდება“, - განაცხადა ირაკლი კობახიძემ.

ცოტა ხნის წინ, „თბილისი პრაიდმა“ განცხადება გაავრცელა, რომლის მიხედვითაც, მარში დღეს არ შედგება.

დღეს „თბილისი პრაიდის“ მოწინააღმდეგეები „პრაიდის“ ორგანიზატორების ოფისში შეიჭრნენ, დაიკავეს აივანი, ჩამოხსნეს ლგბტ თემის შვიდფერიანი დროშა და საქართველოს დროშა აღმართეს. იქამდე, „სირცხვილიას“ ოფისს ბოთლები და სამშენებლო ფილები დაუშინეს. ამასთან, ფიზიკურად გაუსწორდნენ არაერთი მედიასაშუალების, მათ შორის, „იმედის“ თანამშრომლებს.

„სირცხვილიასა“ და „თბილისი პრაიდის“ ოფისზე განხორციელებულ კანონსაწინააღმდეგო ფაქტებთან დაკავშირებით, შსს-მ გამოძიება დაიწყო.