პრეზიდენტის შენიშვნები დღეს ბიუროს წარედგინება

პრეზიდენტის მოტივირებული შენიშვნები დღეს პარლამენტის ბიუროს წარედგინება. სხდომა 11:00 საათზე დაიწყება. კანონმდებლები პრეზიდენტის ვეტოზე და რიგგარეშე სხდომის ჩატარებაზე იმსჯელებენ. რიგგარეშე სხდომა ქუთაისის პარლამენტში, სავარაუდოდ, 26 ივლისს გაიმართება.

გიორგი მარგველაშვილმა ვეტო 3 კანონპროექტს დაადო - ერთი ადგილობრივი თვითმმართველობის კოდექსში ცვლილებების პროექტია, ორი კი - საარჩევნო კოდექსთან დაკავშირებული ორი კანონროექტი.

კანონპროექტით, 7 თვითმმართველ ქალაქს - თელავს, ოზურგეთს, ზუგდიდს, გორს, ამბროლაურს, მცხეთას და ახალციხეს - თვითმმართველი ქალაქის სტატუსი ჩამოერთმევა და ისინი შესაბამის მუნიციპალიტეტებს მიუერთდება. 12 თვითმმართველი ქალაქის ნაცვლად 5 თვითმმართველი ქალაქი იქნება.

პრეზიდენტის მოტივირებულ შენიშვნებში წერია, რომ სახალხო სუვერენიტეტი, ემსახურება რა ხალხის ხელისუფლების განხორციელებაში მონაწილეობის უზრუნველყოფას და შედეგად, პირდაპირი, უშუალო დემოკრატიის რეალიზაციას, მმართველობის ყველა დონეზე უნდა განხორციელდეს. გიორგი მარგველაშვილის შეფასებით, ეს უპირველესად გულისხმობს მოქალაქეთათვის ადგილობრივი ხელისუფლების ხელმისაწვდომობასაც.

"ხალხს უნდა ჰქონდეს გარანტირებული შესაძლებლობა, უშუალოდ ან წარმომადგენლების მეშვეობით გადაწყვიტოს საკუთარი პრობლემები, დაიცვას საკუთარი ინტერესები, უზრუნველყოს უფლებების რეალიზაცია. ამ თვალსაზრისით, ხელისუფლების განხორციელებაში პირდაპირი, უშუალო მონაწილეობა ადგილობრივ დონეზეა განსაკუთრებით ეფექტიანი", - წერია მოტივირებულ შენიშვნებში.

აღნიშნულია, რომ რაც უფრო დიდია მუნიციპალიტეტი, მით უფრო ძნელია სახელისუფლებო ორგანოების გადაწყვეტილებებსა და ბიუჯეტში პრიორიტეტული საჭიროებების მაქსიმალურად ადეკვატურად ასახვა; დოკუმენტის თანახმად, რაც უფრო დიდია მუნიციპალიტეტი, მით უფრო იკარგება თვითმმართველობის იდეა, ადეკვატურად უპასუხოს მოსახლეობის პრობლემებს და საჭიროებებს. მუნიციპალიტეტები მსხვილდება მხოლოდ აუცილებელი მინიმუმის ფარგლებში.

პრეზიდენტმა ვეტო დაადო კანონოპროექტს, რომელიც თვითმმართველი ქალაქების და თემების საკრებულოების ახლებურად ფორმირებას და საკრებულოებში მაჟორიტართა რაოდენობის გაზრდას ითვალისწინებს.

კანონპროექტის თანახმად, ცესკო-ს წევრების დანიშვნის და მათთვის უფლებამოსილების შეწყვეტის წესი იცვლება. 6 წევრს ის პარტიები დანიშნავენ, რომლებიც საპარლამენტო არჩევნებში მონაწილეობის მიზნით რეგისტრირებული იყვნენ დამოუკიდებლად ან საარჩევნო ბლოკის მეშვეობით, რომლებსაც მიეკუთვნათ პარლამენტის წევრთა მანდატები და რომლებმაც შექმნეს საპარლამენტო ფრაქცია. წევრების დანიშვნა დამოკიდებული იქნება პარტიის მიერ ბოლო საპარლამენტო არჩევნებში მიღებული ხმების რაოდენობაზე. პარტიას ერთზე მეტი წევრის დანიშვნის უფლება ექნება. მოქმედი წესით, წევრის დანიშვნა დამოკიდებულია პარტიის მიერ სახელმწიფო ბიუჯეტიდან მიღებულ დაფინანსებაზე.

პრეზიდენტის მოტივირებულ შენიშვნებში წერია, რომ ცესკო-ს დაკომპლექტების შემოთავაზებული წესი ვერ უზრუნველყოფს მრავალპარტიულ წარმომადგენლობას საარჩევნო კომისიებში, საარჩევნო ადმინისტრაციისადმი ნდობას და არჩევნების მართვის პროცესში პოლიტიკურ პლურალიზმს; რომ გათვალისწინებული აღარ იქნება ადგილობრივი თვითმმართველობის არჩევნების შედეგები, რითაც კნინდება მისი როლი და მნიშვნელობა. პრეზიდენტი სთავაზობს პარლამენტს, უცვლელი დარჩეს ცესკო-ს დაკომპლექტების წესი და საოლქო და საუბნო საარჩევნო კომისიების წევრთა რაოდენობა.

პრეზიდენტი არც ცესკო-ს თავმჯდომარის არჩევის წესის შეცვლის ინიციატივას იზიარებს და პარლამენტს წესის უცვლელად დატოვებას სთავაზობს. მოქმედი წესით, ცესკო-ს თავმჯდომარეს პრეზიდენტის წარდგინებით ცესკო-ში პარტიების წევრები ირჩევენ, გარდა წინა საპარლამენტო არჩევნებში საუკეთესო შედეგების მქონე პარტიის მიერ დანიშნული წევრისა. თავმჯდომარე თუ ვერ აირჩიეს, მას პარლამენტი ირჩევს. კანონპროექტი ითვალისწინებს ცესკო-ს თავმჯდომარის არჩევას ცესკო-ს წევრების ორი მესამედის ან პარლამენტის მიერ. პრეზიდენტის შეფასებით, საარჩევნო ადმინისტრაციის უმაღლესი ხელმძღვანელის ცესკო-ს ორი მესამედით არჩევის შემთხვევაში, არჩევის პროცესზე გაიზრდება მმართველი პარტიის გავლენა, რაც შედეგების ლეგიტიმურობას შეამცირებს.