ვახუშტი მენაბდე მოსამართლეების მოსმენაზე: თუ სამოქალაქო სექტორს რამე აკლია, ერთმანეთის სტრატეგიებსა და იდეებზე კრიტიკული დისკუსიაა

„ახალგაზრდა იურისტთა ასოციაციის“ პროგრამის დირექტორი, ვახუშტი მენაბდე Facebook-ის საკუთარ გვერდზე იმ არასამთავრობო ორგანიზაციებს პასუხობს, რომელთაც საია უზენაესი სასამართლოს კანდიდატების მოსმენაში მონაწილეობისთვის გააკრიტიკა.

„საია ესწრება უზენაესი სასამართლოს კანდიდატების მოსმენას იურიდიულ კომიტეტში. არასამთავრობო ორგანიზაციების ნაწილმა, ამ ნაბიჯის გამო, პროცესისთვის ლეგიტიმაციის მინიჭებაში დაგვდო ბრალი, „ოცნებისა“ და კლანის მიერ დაგეგმილი პროცესის „გაპრავება”-ში დაგვადანაშაულა. თავად მათ ბოიკოტი გამოუცხადეს პროცესს, რადგან ის არასწორად მიაჩნიათ. ცხადია, კოლეგებს უფლება აქვთ ჰქონდეთ საკუთარი შეხედულებები ჩვენს სტრატეგიაზე და გამოხატონ ისინი. მივესალმები ამ დისკუსიის გახსნას, რადგან თუ რამე აკლია სამოქალაქო სექტორს ერთმანეთის სტრატეგიებსა და იდეებზე კრიტიკული დისკუსიაა. თითქოს ერთმანეთს ვუფრთხილდებით რეალურად კი სექტორსაც ვაზიანებთ და იმ საქმესაც რომელსაც დეკლარირებულად ვემსახურებით. ამიტომ მიხარია ამ პროცესის გახსნა და სიამოვნებით ჩავერთვები ამ დისკუსიაში“, - აღნიშნავს ვახუშტი მენაბდე.

მისივე განმარტებით, სინამდვილეში, საია სხდომებს იმის გამო ესწრება, რის გამოც, მათი კოლეგები გარეთ დარჩნენ.

„თუ სამოქალაქო სექტორის იმ წარმომადგენლების, ვინც ამ პროცესშია, კომენტარებს, კითხვებს დააკვირდებით (და მომავლში ეს კიდევ უფრო მკაფიოდ გამოჩნდება) ნახავთ რომ ამოცანა პროცესთან წინააღმდეგობის ჩვენებაა. მისი კრიტიკა და გამოწვევა. ჩვენ ვცდილობთ ჩვენი სტრატეგიით ვიაროთ, კოლეგები კი მზად უნდა იყვნენ, რომ, ზოგჯერ, ეს სტრატეგიები მათსას ასცდება. სამოქალაქო სექტორი არ არის ერთი პარტია, რომ აზრთა სხვადასხვაობამ გაგვაკვირვოს. ჩვენ შორის იმდენი განსხვავებაა, ერთიანი პოზიციაზე ჩამოყალიბებას რომ ვახერხებთ ხოლმე, ის მიკვირს და არა - პირიქით“, - წერს ვახუშტი მენაბდე.

იურიდიულ საკითხთა კომიტეტში პარლამენტისთვის ასარჩევად წარდგენილი უზენაესი სასამართლოს მოსამართლეობის კანდიდატებთან გასაუბრების პროცესი დღეს დაიწყო და დღის განმავლობაში, გოჩა აბუსერიძესა და გიორგი გოგიაშვილს გაესაუბრებიან.

პარლამენტისთვის ასარჩევად, სულ წარდგენილია უზენაესი სასამართლოს მოსამართლეობის 9 კანდიდატი: გოჩა აბუსერიძე, გიორგი გოგიაშვილი, ლევან თევზაძე, ქეთევან მესხიშვილი, გიორგი შავლიაშვილი, რევაზ ნადარაია, ბიძინა სტურუა, ეკა ზარნაძე და ლაშა ქოჩიაშვილი.

იურიდიულ საკითხთა კომიტეტში უზენაესი სასამართლოს მოსამართლეობის კანდიდატებთან გასაუბრება 10 ივლისს დასრულდება.