უზენაესი სასამართლოს მოსამართლეობის კანდიდატი გოჩა აბუსერიძე მიიჩნევს, რომ გაუმართლებელია, როცა, დავის წაგებისას, სახელმწიფო სტრუქტურები „საქმეებს ბოლომდე მიჰყვებიან“

პარლამენტის იურიდიულ საკითხთა კომიტეტში, სადაც უზენაესი სასამართლოს მოსამართლეობის კანდიდატს, გოჩა აბუსერიძეს უსმენენ, კანდიდატმა, სახელმწიფო სტრუქტურების გადაწყვეტილებების გამო, სასამართლო სისტემის გადატვირთვაზე ისაუბრა და აღნიშნა, რომ გაუმართლებელია, როდესაც სახელმწიფო ორგანო, დავის წაგების შემთხვევაშიც, გადაწყვეტილებას მაინც ასაჩივრებს მეორე და მესამე ინსტანციებში.

„პირველ რიგში, აღსანიშნავია, რომ მოსამართლეთა რაოდენობა არ არის საკმარისი. მეორე საკითხია, რომ ადმინისტრაციულ ორგანოთა უმრავლესობა თბილისშია და ამის გამო, გადატვირთულია თბილისის საქალაქო სასამართლო და ერთ მოსამართლეს, შესაძლოა, 800-ზე მეტი საქმე ჰქონდეს. მესამე საკითხია სახელმწიფო ინსტიტუტების მიდგომა გასაჩივრებასთან დაკავშირებით - როდესაც სასამართლოს მიერ პრაქტიკა დადგენილია, იმის გათვალისწინებით, რომ სახელმწიფო სტრუქტურები არ იხდიან სახელმწიფო ბაჟს, მაინც, როგორც თვითონ ამბობენ, ბოლომდე მიჰყვებიან საქმეს. ეს გაუმართლებელია. ჩემი ხედვები მქონდა, მაგალითად, ბაჟის შესახებ კანონის გაუქმების თვალსაზრისით ან, პირიქით, ვფიქრობდი, რომ, თუმცა, რამდენად კონსტიტუციური იქნებოდა, არ ვიცი, მიუხედავად იმისა, რომ სახელმწიფო ორგანო გათავისუფლებულია ბაჟის გადახდისგან, დავის წაგების შემთხვევაში, სახელმწიფო ბაჟის გადახდის სანაცვლო თანხა დაკისრებოდა აპელაციის უშუალოდ შემომტან პირს და არა წარმომადგენელს, რათა ამას გარკვეული შემაკავებელი ეფექტი ჰქონოდა“, - აღნიშნა გოჩა აბუსერიძემ.

იურიდიულ საკითხთა კომიტეტში პარლამენტისთვის ასარჩევად წარდგენილი უზენაესი სასამართლოს მოსამართლეობის კანდიდატებთან გასაუბრების პროცესი დღეს დაიწყო და დღის განმავლობაში, გოჩა აბუსერიძესა და გიორგი გოგიაშვილს გაესაუბრებიან.

პარლამენტისთვის ასარჩევად, სულ წარდგენილია უზენაესი სასამართლოს მოსამართლეობის 9 კანდიდატი: გოჩა აბუსერიძე, გიორგი გოგიაშვილი, ლევან თევზაძე, ქეთევან მესხიშვილი, გიორგი შავლიაშვილი, რევაზ ნადარაია, ბიძინა სტურუა, ეკა ზარნაძე და ლაშა ქოჩიაშვილი.

იურიდიულ საკითხთა კომიტეტში უზენაესი სასამართლოს მოსამართლეობის კანდიდატებთან გასაუბრება 10 ივლისს დასრულდება.