ირმა გახელაძე: დიდი დახმარებაა პატრიარქის, მთავრობის, პრემიერის და ყველა იმ ადამიანის, რომელიც ზაზას გამოშვების წუთამდე მუშაობდა

ირმა გახელაძის თქმით, მისი მეუღლის გამოშვება ოჯახისთვის შოკისმომგვრელი იყო. ზაზა გახელაძის ცოლმა კიდევ ერთხელ გადაუხადა მადლობა მთავრობასა და საპატრიარქოს დახმარებისთვის.

„ზაზას დილის 8 საათზე წითელი ჯვრის მეშვეობით ნობათი გავუგზავნე. ზაზამ მიიღო ეს ამანათი. წითელი ჯვრის მეშვეობით ზაზა „სკაიპით“ დაგვალაპარაკეს. 1 საათით ადრე გააგებინეს. აიღე შენი ნივთები და გიშვებთ სახლშიო. შოკისმომგვრელი იყო. წუხელაც თქვა, ვერ ვაცნობიერებ, რომ უკვე სახლში ვარო. ვერც ჩვენ. ძალიან დიდი ემოციაა და ალბათ მეორედ დაბადება ჩვენი. ეს მუშაობა რომ არ ყოფილიყო, არ იქნებოდა ეს შედეგიც. დიდი დახმარებაა პატრიარქის, დიდი დახმარება და ჩართულობაა მთავრობის, პრემიერის და ყველა იმ ადამიანის, რომელიც გამოშვების წუთამდე მუშაობდა“, - აღნიშნა ირმა გახელაძემ.

რუსეთის საოკუპაციო ძალების წარმომადგენლებმა ზაზა გახელაძე 2020 წლის 11 ივლისს დაჭრეს და დააკავეს. ოკუპირებული ცხინვალის ე.წ. სასამართლომ მას 12 წლითა და 6 თვით უკანონო პატიმრობა 5 თებერვალს მიუსაჯა. გახელაძეს ბრალდება რუსეთის ფედერაციის სისხლის სამართლის კოდექსის ორი მუხლით ედავებოდა: 317-ე მუხლით, რომელიც სამხედრო მოსამსახურის სიცოცხლის ხელყოფის მცდელობად კვალიფიცირდება და 322-ე მუხლით, რაც „სახელმწიფო საზღვრის უკანონოდ გადაკვეთას“ გულისხმობს.

ზაზა გახელაძე ოკუპანტებმა 14 ივლისს გაათავისუფლეს. მისი გათავისუფლების პროცესში ჩართული იყვნენ მთავრობისა და საერთაშორისო საზოგადოების წარმომადგენლები.

8 მაისს საქართველოს პრემიერ-მინისტრი ირაკლი ღარიბაშვილი ზაზა გახელაძის ოჯახის წევრებს შეხვდა. პრემიერი ოჯახს საქართველოს უკანონოდ დაკავებული მოქალაქის გასათავისუფლებლად ცენტრალური ხელისუფლების მიერ გადადგმულ ნაბიჯებზე ესაუბრა. მთავრობის მეთაურმა აღნიშნა, რომ ცენტრალური ხელისუფლება იყენებს მის ხელთ არსებულ ყველა ბერკეტს ზაზა გახელაძის დაუყოვნებლივ გასათავისუფლებლად, ეს საკითხი დაყენებულია მაღალ პოლიტიკურ დონეზე და აქტიურად განიხილება საერთაშორისო პარტნიორებთან.