დავით ბაქრაძე: გამოსავალი გახლავთ პოლიტიკური პასუხისმგებლობის აღება და დამნაშავეების დასჯა

გამოსავალი გახლავთ პოლიტიკური პასუხისმგებლობის აღება შს მინისტრისა და პრემიერ-მინისტრის გადადგომა, დამნაშავეების დასჯა და ამით ვითარების დამშვიდება, - ამის შესახებ ოპოზიციონერმა დეპუტატმა, დავით ბაქრაძემ განაცხადა.

მისი თქმით, საკანონმდებლო ორგანოში განვითარებული მოვლენები იმაზე მეტყველებს, რომ ხელისუფლება მორალურად არის ჩამოშლილი.

„ის რაც დღეს მოხდა, მხოლოდ ერთ რამეს ნიშნავს, იმდენად არის ხელისუფლება მორალურად ჩამოშლილი და დემორალიზებული, რომ მათ არ შეუძლიათ ჟურნალისტების მხრიდან ბანერით, აბსოლუტურად მშვიდობიანი ბანერით გამოხატული პროტესტის ატანაც კი. გამოსავალი გახლავთ პოლიტიკური პასუხისმგებლობის აღება შს მინისტრისა და პრემიერ-მინისტრის გადადგომა, დამნაშავეების დასჯა და ამით ვითარების დამშვიდება“, - განაცხადა დავით ბაქრაძემ.

პარლამენტში, შს მინისტრს გამოსვლა ოპოზიციამ შეაწყვეტინა. სხდომაზე, ოპოზიციის წარმომადგენლები ტრიბუნასთან „ტვ პირველის“ ოპერატორის, ლექსო ლაშქარავას ფოტოებით მივიდნენ.

ხმაურის გამო, პარლამენტის თავმჯდომარემ, კახა კუჭავამ ტექნიკური შესვენება რამდენჯერმე გამოაცხადა.