მამუკა მდინარაძე: დიდი მადლობა სამართალდამცავ უწყებებს, რომლებმაც აღკვეთეს უდიდესი პროვოკაცია, რომელიც იგეგმებოდა ყველაზე დიდი ავანტიურისტის, მიხეილ სააკაშვილის მიერ

დიდი მადლობა სამართალდამცავ უწყებებს, რომლებმაც აღკვეთეს უდიდესი პროვოკაცია, რომელიც იგეგმებოდა ყველაზე დიდი ავანტიურისტის, მიხეილ სააკაშვილის მიერ, - ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ ბრიფინგზე განაცხადა.

მისი თქმით, სააკაშვილის მიერ იგეგმებოდა პროვოკაცია და ამის აღკვეთა მოხდა.

„დიდი მადლობა ქართველ სამართალდამცავ უწყებებს, რომლებმაც აღკვეთეს უდიდესი პროვოკაცია და როდესაც ყველაფერი ნათელი ხდება, კარგად ხვდებით, რომ ეს იყო უდიდესი პროვოკაცია, რომელიც იგეგმებოდა ყველაზე დიდი ავანტიურისტის, მიხეილ სააკაშვილის მიერ და საბედნიეროდ, ეს იქნა აღკვეთილი. ამ მაღალი კლასით შესრულებულ სპეცოპერაციასთან დაკავშირებით, ბუნებრივია, ჩვენ მადლობა უნდა გადავუხადოთ სამართალდამცავებს“, - განაცხადა მამუკა მდინარაძემ.

მისივე თქმით, დარწმუნებულია, ამ პროვოკაციას ხვალ, არჩევნებზე ასევე უპასუხებენ „ქართული ოცნების“ მომხრეები.

„რაც შეეხება ხვალინდელ დღეს, დარწმუნებული ვარ, „ქართული ოცნების“ ყველა ამომრჩეველი, ვინც აპირებდა და არ აპირებდა არჩევნებზე მისვლას, ამ უდიდეს პროვოკაციას, რომელსაც პირველ რიგში სამართალდამცველებმა უპასუხეს, ასევე უპასუხებენ ჩვენი მომხრეები და ის მოქალაქეები, რომლებიც ამ ყველაფერს კარგად ხედავენ. ხვალ ყველა უნდა მივიდეს საარჩევნო ყუთთან, მხარი დაუჭიროს იმ პოლიტიკურ გუნდს, რომელსაც ორიენტირი აქვს განვითარებაზე, მომავალზე, რეალურად დასავლურ კურსზე და არ ფიქრობს არეულობაზე, ქაოსზე, ფიქრობს თავის ქვეყანაზე და უყვარს თავისი სამშობლო, ეს იქნება დღევანდელი და ხვალინდელი დღის ბოლომდე წარმატებით დაგვირგვინება“, - აღნიშნა მამუკა მდინარაძემ.

საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს. ირაკლი ღარიბაშვილის განცხადებით, ქართულ სამართალდამცავ უწყებებს ჰქონდათ წინასწარი ინფორმაცია სააკაშვილის გადაადგილების შესახებ, უკრაინიდან საქართველოს მიმართულებით და ეს პროცესი იყო სრული კონტროლის ქვეშ.