მამუკა მდინარაძე სააკაშვილის დაკავებაზე: წესით, პოლიტიკურმა ხელმძღვანელობამ არ უნდა იცოდეს ასეთი გასაიდუმლოებული ღონისძიების შესახებ - ბოლომდე გვჯეროდა, რომ ის უკრაინაში იყო

წესით, პოლიტიკურმა ხელმძღვანელობამ არ უნდა იცოდეს ასეთი გასაიდუმლოებული ღონისძიების შესახებ. ეს ხელისუფლების დანაწილების სწორი პრინციპის შესაბამისია, - ამის შესახებ პატია „ქართული ოცნების“ აღმასრულებელმა მდივანმა, მამუკა მდინარაძემ მიხეილ სააკაშვილის აყვანასთან დაკავშირებით, გადაცემაში „არჩევნები 2021“ განაცხადა.

მისი თქმით, ბოლო მომენტამდე სჯეროდა, რომ მიხეილ სააკაშვილი უკრაინაში იყო. მდინარაძის თქმით, არჩევნების წინა დღეს შეიქმნა საკმაოდ უხერხული მდგომარეობა.

„ეს იცით და მოვიბოდიშე კიდეც გარკვეული საკითხების გამო. მე პირადად, მსგავსი უხერხულობა არათუ პოლიტიკაში მოსვლის შემდეგ, არამედ მანამდეც არ მქონია“, - განაცხადა მდინარაძემ.

მისი თქმით, მისთვის უმჯობესია, სიმართლე ილაპარაკოს შექმნილი უხერხულობის გამო.

„ჩვენს გუნდში არ არიან ისეთი ადამიანები, არც მე და არც სხვა, რაღაც პოსტ-ფაქტუმ არასწორი ვისაუბროთ, რომ რაიმე ვიცოდი. ჯერ ერთი, არ უნდა მცოდნოდა; მეორეც - არც იქნებოდა სწორი, რომ მცოდნოდა; მესამე - ეს იყო ძალიან ბევრი და არა მხოლოდ საქართველოს ფარგლებს შიგნით, წყაროებიდან მოწოდებული ინფორმაცია, არამედ ფარგლებს გარეთაც მსგავსი ინფორმაცია იყო და ჩვენ ამაზე ვსაუბრობდით. დღემდე ვკამათობთ ვიდეოს თემაზე და ბევრ სხვა თემაზე, თუმცა ეს ყველაფერი მეორეხარისხოვანი გახდა მას შემდეგ, რაც გავიგეთ დაგეგმილი ღონისძიების სისწორის შესახებ; როდესაც აგვიხსნეს კარგად - ჩვენ ამასთან დაკავშირებით ვრცელი საუბარი გვქონდა, აგვიხსნეს იმ დეტალების შესახებ, რის გამოც ღონისძიება ვერ ჩაიშლებოდა და რისკის ქვეშ ვერ დადგებოდა. გასაგებია და აბსოლუტურად მისაღებია ის უხერხულობაც ჩემთვის, რაც შემექმნა პირადად მე და ჩვენი გუნდის არაერთ ლიდერს მთელი დღის განმავლობაში“, - განაცხადა მამუკა მდინარაძემ.