აფხაზეთში რუსი ტურისტები საგზაო ინციდენტის შემდეგ მძევლებად აიყვანეს

აფხაზეთში, ორი ეკატერინბურგელი ტურისტი, საგზაო ინციდენტის შემდეგ, ფაქტობრივად, მძევლებად აიყვანეს. დაზარალებული მხარე მათ კომპენსაციის გადახდას სთხოვს და "რესპუბლიკის" ტერიტორიის დატოვების საშუალებას არ აძლევს, - წერს эхо москвы საინფორმაციო სააგენტო Ура.ру-ზე დაყრდნობით. 

გაგრის საგზაო მილიციის განყოფილებაში საჭესთან მჯდომ ტურისტ ვასილი სნეგირიოვს უთხრეს, რომ "ყველასთვის კარგი გამოსავალი იქნება" თუ ის 200 ათასს რუბლს (3300 დოლარი) გადაიხდის. ამასთან, კაცს წაართვეს მართვის მოწმობა და ავტომობილის დოკუმენტები, ასევე გააფრთხილეს, რომ საზღვარზე "ჩვენი ხალხია" და რომ სნეგირიოვები რესპუბლიკას ვერ დატოვებენ.

ეკატერინბურგელმა ქალაქის პროკურორის თანაშემწეს მიმართა, თუმცა მას უპასუხეს, რომ პროკურატურა საქმეში არ ჩაერევა, მხოლოდ დააკვირდება პროცესს.         

სააგენტოს ცნობით, ეკატერინბურგის მერის ევგენი როიზმანის თქმით, თუ სიტუაცია სწრაფად და მშვიდობიანად არ მოგვარდა, ის ყველაფერს გააკეთებს იმისთვის, რომ მისი ქალაქის მცხოვრებლებმა აღარ იმოგზაურონ აფხაზეთში. მან ასევე აღნიშნა, რომ ამ საქმეს ასე არ დატოვებს და პირადად გააკონტროლებს.

რუსეთის ეგრეთ წოდებულმა საელჩომ აფხაზეთში, უარყო ორი თანამემამულის მძევლად აყვანის ფაქტი. "საელჩოს" ატაშემ ტურალ ჯავადოვმა საგზაო შემთხვევის ფაქტი დაადასტურა და სააგენტო РИА-ს განუცხადა, რომ დაზარალებული რუსი მძღოლისგან მართლაც ითხოვს 200 ათასს რუბლს კომპენსაციის სახით. "ჩვენ ოფიციალური წერილი გავუგზავნეთ აფხაზეთის გენერალურ პროკურატურას და ვთხოვეთ გაერკვეს სიტუაციაში. რუსეთის მოქალაქის ავტომობილი ამ ეტაპზე ქალაქ გაგრაშია და იქ იქნება საგამოძიებო ღონისძიებების დასრულებამდე", - აღნიშნა ჯავადოვმა.

ბოლო დროს ოკუპირებულ აფხაზეთში რუს ტურისტებზე თავდასხმების შემთხვევები გახშირდა. გავრცელებული ინფორმაციით, მათ ხშირად ძარცვის მიზნით აყაჩაღებენ, რაც ზოგჯერ მკვლელობითაც მთავრდება. 

27 ივლისს ბიჭვინთაში მცირეძრავიანი ვერტმფრენი ჩამოვარდა, შედეგად სამი ადამიანი დაიღუპა მათ შორის რუსეთის მოქალაქეც.

2 აგვისტოს გუდაუთის რაიონის სოფელ პრიმორსკოესთან მდებარე სამხედრო საწყობში აფეთქება მოხდა. დაშავდა 50 ადამიანზე მეტი, აქედან 35 რუსი, მათგან 27 საავადმყოფოში გადაიყვანეს. 3 აგვისტოს აფეთქებული სამხედრო საწყობის მიმდებარე ტერიტორიაზე 2 პეტერბურგელი ტურისტი ქალის ცხედარი იპოვეს.

ამ ინციდენტების გამო, რუსი ტურისტების ნაკადი ოკუპირებულ რეგიონში მკვეთრად შემცირდა. 

8 აგვისტოს, რუსეთ-საქართველოს ომის მე-9 წლისთავზე ოკუპირებულ აფხაზეთში "სამუშაო ვიზიტით" ჩავიდა რუსეთის პრეზიდენტი ვლადიმერ პუტინი.

BBC-ის რუსულენოვანი გამოცემის ცნობით, ბოლო 8 წელიწადში რუსეთმა ოკუპირებულ აფხაზეთსა და ცხინვალს ფინანსური დახმარების სახით 854 116 მილიონი დოლარი გამოუყო.