მამუკა მდინარაძე: გულწრფელად მგონია, რომ რუსთავში დამარცხებისთვის არის განწირული კანდიდატი, რომელიც თან იქნება „ნაციონალური მოძრაობის“ კანდიდატი და თან სხვა ნომრით გამოვა

გულწრფელად მგონია, რომ რუსთავში უკვე დამარცხებისთვის არის განწირული კანდიდატი, რომელიც ირაკლი შატაკიშვილს მეორე მხარეს დაუდგება, თუ ის თან იქნება „ნაციონალური მოძრაობის“ კანდიდატი და თან სხვა ნომრით გამოვა, - ამის შესახებ მამუკა მდინარაძემ გადაცემაში „იმედი LIVE“ განაცხადა. ფრაქცია „ქართული ოცნების“ თავმჯდომარის თქმით, „ნაცმოძრაობას“ ჰყავს ელექტორატი, რომელიც მათ საარჩევნო ნომერს აღიარებს.

„ლელო“ და „ნაცმოძრაობა“ რეალურად ერთი ორგანიზმი არის. ამას აქვს პლუსები და მინუსები. მათ შორის პლუსებია ის, რომ „ნაცმოძრაობა“ არის, სამწუხაროდ, ჯერ კიდევ მეორე ადგილზე მყოფი პარტია და მისი მხარდაჭერა, ბუნებრივია, სხვა ოპოზიციონერებისთვის სასურველია, რადგან მათი რეიტინგი დაემატება. მინუსი იმაში მდგომარეობს, რომ მათი რეიტინგი ბოლომდე ვერ დაემატება. როცა სხვა ნომრით გამოდის კანდიდატი, პრაქტიკამაც გვაჩვენა, რომ „ნაცმოძრაობის“ ამომრჩეველი არ სწყალობს სხვა პარტიების წარმომადგენლებს იმდენად, რომ ხუთიანი თუ არ დახვდებათ, არ ხაზავენ ყველას“, - განაცხადა მდინარაძემ.

პარლამენტის ოთხ წევრს, მათ შორის ბადრი ჯაფარიძეს სადეპუტატო უფლებამოსილება 16 თებერვალს შეუწყდათ, რის შემდეგაც, რამდენიმე საათში, „ლელოში“ განაცხადეს, რომ პარტია ჯაფარიძეს შუალედურ არჩევნებზე რუსთავის მაჟორიტარად წარადგენს.