კახა იმნაძე: ჩვენ ვგმობთ რუსეთის აგრესიას და ჰუმანიტარული დერეფნების გახსნის დროს პირობის დარღვევას, რასაც სამოქალაქო პირები, მათ შორის ბავშვები ეწირებიან

საქართველო უკრაინას მორიგ მხარდაჭერას უცხადებს და რუსეთის აგრესიულ ქმედებებს გმობს. გაეროში საქართველოს მუდმივი წარმომადგენელი კახა იმნაძე უშიშროების საბჭოს ღია დებატებზე სიტყვით გამოვიდა და რუსეთს უკრაინიდან და საქართველოდან შეიარაღებული ძალების გაყვანისკენ მოუწოდა. ელჩმა ყურადღება გაამახვილა ქალებისა და ბავშვების მძიმე მდგომარეობაზე, ინფრასტრუქტურის მიზანმიმართულ განადგურებასა და რუსეთის მხრიდან შეთანხმების დარღვევაზე, რომელიც ჰუმანიტარული დერეფნების გახსნას ეხებოდა. კახა იმნაძის შეფასებით, რუსეთი დღეს იმავე ხელწერით მოქმედებს უკრაინის წინააღმდეგ, როგორც ეს 2008 წელს, საქართველოს შემთხვევაში მოხდა. უკრაინის მხარდაჭერასთან ერთად, გაეროში საქართველოს მუდმივმა წარმომადგენელმა საერთაშორისო თანამეგობრობას კიდევ ერთხელ შეახსენა რუსეთის შეუსრულებელი ვალდებულებები, რომელიც 2008 წლის 12 აგვისტოს ცეცხლის შეწყვეტის შეთანხმების სახელითაა ცნობილი.

„დღეს, როგორც არასდროს, ქალებს სჭირდებათ მშვიდობა, რადგანაც ქალები და ბავშვები ყველა დაუცველები არიან უკრაინის ომში. სამოქალაქო ინფრასტრუქტურაზე, სკოლებზე, ბაღებზე, საავადმყოფოზე საზარელი თავდასხმების შედეგია, რომ ბავშვები და ქალები იღუპებიან. 2 მილიონი უკრაინელი უკვე ლტოლვილია და ევროპის აღმოსავლეთ ქვეყნებში აფარებენ თავს. მათი უმეტესობა ქალები და ბავშვებია. ჩვენ ვგმობთ რუსეთის აგრესიას და ჰუმანიტარული დერეფნების გახსნის დროს პირობის დარღვევას, რასაც სამოქალაქო პირები, მათ შორის ბავშვები ეწირებიან. ეს არის ადამიანის უფლებების საერთაშორისო ნორმების უხეში დარღვევა. ადამიანის უფლებების ყველა საერთაშორისო მექანიზმმა უნდა უზრუნველყოს უკრაინის ტერიტორიაზე ადამიანების უსაფრთხოება. რუსეთის მხრიდან ოკუპაცია, სამწუხაროდ, ახლაც გრძელდება საქართველოში. ფაქტია, რომ ახლა უკრაინაში ვხედავთ იმას, რაც ჩვენმა ქვეყანამ წლების წინ გადაიტანა. 2008 წელს ცეცხლის შეწყვეტის შეთანხმების მიუხედავად, რომელშიც საერთაშორისო საზოგადოება მონაწილეობდა, რუსეთი აგრძელებს უკანონო პროვოკაციებსა და მცოცავ ოკუპაციას. ამის ფონზე, სამოქალაქო პირების უფლებები ისევ დაუცველია, მათ შორის ქალებისა და ბავშვების“, - განაცხადა იმნაძემ.