ლაშა დარსალია ეროვნულ უმცირესობათა საკითხებში ეუთო-ს უმაღლეს კომისარს შეხვდა

საქართველოს ვიზიტით ეწვია ეროვნულ უმცირესობათა საკითხებში ეუთო-ს უმაღლესი კომისარი, კაირატ აბდრახმანოვი. აღსანიშნავია, რომ უმაღლესი კომისრის რანგში ეს მისი პირველი ვიზიტია საქართველოში, რომელიც 16 აპრილამდე გაგრძელდება. ვიზიტის ფარგლებში, 12 აპრილს უმაღლესმა კომისარმა შეხვედრა გამართა საქართველოს საგარეო საქმეთა მინისტრის პირველ მოადგილესთან, ლაშა დარსალიასთან, - ამის შესახებ ინფორმაციას საგარეო საქმეთა სამინისტრო ავრცელებს.

მათივე ინფორმაციით, შეხვედრისას მხარეებმა განიხილეს საქართველოსა და უმაღლესი კომისრის ოფისს შორის არსებული მჭიდრო თანამშრომლობის საკითხები, კერძოდ, საუბარი შეეხო ეროვნულ უმცირესობათა მხარდაჭერას, სამოქალაქო თანასწორობისა და ინტეგრაციის საკითხებს. ლაშა დარსალიამ აღნიშნა, რომ ამ პოლიტიკის ქვაკუთხედს წარმოადგენს სამოქალაქო თანასწორობისა და ინტეგრაციის სახელმწიფო სტრატეგია. მინისტრის პირველმა მოადგილემ მადლობა გადაუხადა უმაღლეს კომისარს და მის გუნდს ხსენებული სტრატეგიისა და მისი განხორციელების მხარდაჭერისთვის.

უმაღლესმა კომისარმა ხაზი გაუსვა საქართველოს მიერ ეროვნული უმცირესობების ინტეგრაციის საკითხებში მიღწეულ წარმატებას და აღნიშნა, რომ საქართველოს ძალისხმევა სამაგალითოა და კარგი იქნებოდა ამ კუთხით გამოცდილების გაზიარება სხვა სახელმწიფოებისთვის.

მხარეებმა ისაუბრეს რუსეთ-საქართველოს კონფლიქტსა და მასთან დაკავშირებულ საკითხებზე. ლაშა დარსალიამ უმაღლეს კომისარს ამომწურავი ინფორმაცია მიაწოდა რუსეთის მიერ ოკუპირებულ საქართველოს რეგიონებში არსებული მძიმე ჰუმანიტარული და ადამიანის უფლებების მდგომარეობის შესახებ და ყურადღება გაამახვილა ამ რეგიონებში ქართველების მიმართ გახშირებულ ეთნიკურ დისკრიმინაციაზე. ასევე მან აღნიშნა, რომ ასობით ათასი იძულებით გადაადგილებული პირი და ლტოლვილი მოკლებულია საკუთარ სახლებში უსაფრთხო და ღირსეული დაბრუნების უფლებას.

აღსანიშნავია, რომ ვიზიტის ფარგლებში, 13 აპრილს ეუთო-ს უმაღლესი კომისარი ეწვევა საოკუპაციო ხაზს და ადგილზე გაეცნობა იქ არსებულ, ვითარებას.

საუბარი ასევე შეეხო რუსეთის მიერ უკრაინის წინააღმდეგ მიმდინარე გაუმართლებელი სამხედრო აგრესიის შედეგად შექმნილ უმძიმეს ვითარებას. საგარეო საქმეთა მინისტრის პირველმა მოადგილემ მკაცრად დაგმო უკრაინის წინააღმდეგ რუსეთის აგრესია და კიდევ ერთხელ დაადასტურა უკრაინისადმი საქართველოს სოლიდარობა და ურყევი მხარდაჭერა უკრაინის ტერიტორიული მთლიანობისა და სუვერენიტეტისადმი, მის საერთაშორისოდ აღიარებულ საზღვრებში.

ვიზიტის ფარგლებში ეუთო-ს უმაღლესი კომისარი შეხვედრებს მართავს პრეზიდენტთან, პრემიერ-მინისტრთან, პარლამენტის თავმჯდომარის მოადგილესთან, შერიგებისა და სამოქალაქო თანასწორობის საკითხებში სახელმწიფო მინისტრთან და სხვა მაღალი თანამდებობის პირებთან, სამოქალაქო საზოგადოებასთან და საერთაშორისო ორგანიზაციების წარმომადგენლებთან.