ქართულმა მხარემ ეუთო-ს ევროპული უსაფრთხოების განახლებული დიალოგის ინაუგურაციაში მიიღო მონაწილეობა

ეუთო-ს ფარგლებში, ევროპული უსაფრთხოების განახლებული დიალოგის ინაუგურაცია გაიმართა. აღნიშნული პროცესის ინიციატორია ეუთო-ს მოქმედი პოლონეთის თავმჯდომარეობა. გეგმის თანახმად, განახლებული დიალოგი წარიმართება სამი მიმართულებით: ნდობისა და უსაფრთხოების აღდგენის ზომები; კონფლიქტის პრევენცია/მართვა; უსაფრთხოების არასამხედრო ასპექტები.

ევროპული უსაფრთხოების განახლებული დიალოგის საინაუგურაციო შეხვედრა გახსნა ეუთო-ს მოქმედი თავმჯდომარე ქვეყნის - პოლონეთის საგარეო საქმეთა მინისტრმა, ზბიგნევ რაუმ. საქართველოს დელეგაციის სახელით ღონისძიებაზე სიტყვით წარსდგა საგარეო საქმეთა მინისტრის პირველი მოადგილე ლაშა დარსალია.

საგარეო საქმეთა მინისტრის პირველმა მოადგილემ ყურადღება გაამახვილა ევროპაში უსაფრთხოების კუთხით ამჟამად არსებულ უაღრესად რთულ ვითარებაზე, რაც, მათ შორის, გამოიხატება რუსეთის მიერ საქართველოს ტერიტორიების მიმდინარე ოკუპაციით და უკრაინის საზღვართან ახლოს მასობრივი მობილიზაციით. აღინიშნა, რომ რუსეთის ქმედებები რომელიც მიზნად ისახავს ცივი ომის ტიპის „გავლენის სფეროების“ შემოღების გზით ევროპის დანაწევრებას, გაგრძელებაა მისი არაერთი მცდელობისა, რომ შეცვალოს ევროპაში არსებული სახელმწიფოთაშორისი საზღვრები. ითქვა, რომ რუსეთის დესტრუქციული აქტივობები მიმართულია არა მხოლოდ საქართველოს, უკრაინისა და მოლდოვის სუვერენიტეტისა და ტერიტორიული მთლიანობის წინააღმდეგ, არამედ საფრთხეს უქმნის და მიმართულია სრულიად ევროპული უსაფრთხოების ფუნდამენტური პრინციპების წინააღმდეგ.

ლაშა დარსალიამ ხაზი გაუსვა საქართველოსა და უკრაინაში განთავსებული რუსეთის საოკუპაციო ძალების დაუყოვნებლივი გაყვანის აუცილებლობას და აღნიშნა, რომ საქართველოს სუვერენიტეტი და ტერიტორიული მთლიანობა, ისევე, როგორც საქართველოს ევროპული და ევრო-ატლანტიკური ინტეგრაცია არ არის და ვერ გახდება მოლაპარაკებების საგანი. ასევე, ყურადღება გამახვილდა მრავალი წლის განმავლობაში რუსეთის მიზანმიმართული ქმედებებით შეიარაღებაზე კონტროლისა და უსაფრთხოების განზომილებაში შექმნილ ვაკუუმზე, მათ შორის შეიარაღების კონტროლისა და განიარაღების მექანიზმების საკუთარ იარაღად გამოყენების მცდელობებზე, რაც არღვევს უსაფრთხოების არსებულ არქიტექტურას.

საქართველოს საგარეო საქმეთა მინისტრის პირველმა მოადგილემ სიტყვით გამოსვლისას დაადასტურა ქართული მხარის მზადყოფნა, ჩაერთოს ევროპული უსაფრთხოების განახლებული დიალოგის პროცესში.