ირაკლი პეტრიაშვილი პრემიერმინისტრს რკინიგზელთა აქციაზე რეაგირებისკენ მოუწოდებს

საქართველოს პროფესიული კავშირების გაერთიანების თავმჯდომარე ირაკლი პეტრიაშვილი რკინიგზელთა აქციასთან დაკავშირებით განცხადებას ავრცელებს. "10 ადამიანი დაკავებულია, ორი კი საავადმყოფოში, - ასე მიულოცა კონსტიტუციის დღე სახელმწიფო კომპანია სს „საქართველოს რკინიგზამ“ მოშიმშილეებს, რომლებიც 10 დღის განმავლობაში ითხოვდნენ კონსტიტუციით გარანტირებული მთავარი ნორმების - შეკრების, მანიფესტაციის და გამოხატვის თავისუფლების დაცვას,"-ნათქვამია განცხადებაში. 

ირაკლი პეტრიაშვილი საქართველოს პრემიერმინისტრს მიმართავს და რკინიგზელების აქციაზე რეაგირებისკენ მოუწოდებს. 

„არც ამ ხნის განმავლობაში და არც ადრე, როდესაც თქვენ ინფორმირებული იყავით იმ უმსგავსობის შესახებ, რაც ხდება რკინიგზაში, ქვეყნის მთავრობას და პირადად თქვენ, ბატონო პრემიერმინისტრო, ერთხელაც არ გამოგიხატავთ სურვილი შეხვედროდით სოციალური პარტნიორობის მხარეს, პროფკავშირს და მათგან მოგესმინათ კონფლიქტის რეალური მიზეზი რკინიგზაში. ნაცვლად რეალური ქმედებებისა, ხელისუფლების მხრიდან, ჩვენ ვიღებდით სახელმწიფო კომპანიისაგან ცეცხლზე ნავთის დასხმას და აბსოლუტურად არაადეკვატურ, შეურაცხმყოფელ და დისკრედიტაციულ განცხადებებს - თითქოს მოშიმშილეები არიან მართული მატერიალური ინტერესების სანაცვლოდ საქართველოს პროფკავშირებისგან (სოციალური პარტნიორობის სამმხრივი კომისიის მხარისგან). აღნიშნულმა ბრალდებებმა უფრო გაამძაფრა რკინიგზელების პროტესტი და შეურაცხყო მათი გულწრფელი და ადეკვატური დამოკიდებულება იმ ამაზრზენი მართვის გამო, რომელსაც წლების მანძილზე ახორციელებს რკინიგზის მენეჯმენტი.

სოციალური პარტნიორობის სამმხრივი კომისიის უმოქმედობა, ასევე თქვენი როგორც სამმხრივი კომისიის თავმჯდომარის და საქართველოს პრემიერ-მინისტრის დუმილი, (მიუხედავად იმისა, რომ ხანძრის სახით მთელი საქართველო და პროფკავშირები ვართ უდიდესი გამოწვევის წინაშე) სახელმწიფო კომპანიის მხრიდან განხორციელებულ უმსგავსო ქმედებებზე, ჩვენის მხრიდან აღქმულია, როგორც ხელისუფლების პოზიციის გამოხატულება. ჩვენდა სამწუხაროდ, ვტოვებთ სოციალური პარტნიორობის სამმხრივ კომისიას, იმ დრომდე ვიდრე არ დავინახავთ გულწრფელი დიალოგის სურვილს ხელისუფლების მხრიდან.

თქვენი ეკონომიკის მინისტრობის დროს გაკეთებული განცხადება კი, რომ რკინიგზაში კონფლიქტი არის კომუნიკაციის და დიალოგის არ არსებობის ბრალი, სამწუხაროდ, დღესაც დღის წესრიგშია, როგორც რკინიგზაში ასევე ქვეყნის მასშტაბით“, - აღნიშნულია ირაკლი პეტრიაშვილის პრემიერმინისტრისადმი მიმართვაში.

სამართალდამცველებმა გუშინ რკინიგზელთა აქციის 10-მდე მონაწილე დააკავეს. 2 საავადმყოფოში გადაიყვანეს. საქართველოს რკინიგზის დეპარტამენტთან რკინიგზელების პროტესტი და შიმშილობის აქცია მე-11 დღეა გრძელდება. ამ დროისთვის 14 ადამიანი შიმშილობს.