წულუკიანი არასამთავრობოებს მოსამართლეობის კანდიდატთა შესარჩევ კონკურსში მონაწილეობას ურჩევს

იუსტიციის მინისტრი თეა წულუკიანი არასამთავრობო სექტორს სტრასბურგის სასამართლოსთვის შესარჩევი კომისიის მუშაობაში ჩართვისკენ მოუწოდებს.

„ყველა კანდიდატისადმი ყოველთვის იქნება გარკვეული საწინააღმდეგო მოსაზრებები. არასამთავრობო სექტორს აქვს და მომავალში ექნება შესაძლებლობა, პროცესებში ჩაერთოს. თუ ისინი ამ უფლებას არ გამოიყენებენ, ეს მათი გადასაწყვეტია. ევროსაბჭოს 40-ზე მეტ ქვეყანაში 3-4 ქვეყანა თუ მოიძებნება საქართველოს მსგავსად, სადაც არასამთავრობო სექტორს ასეთი უფლებები და შესაძლებლობები აქვს მიცემული. მე მათ მოვუწოდე და კიდევ ერთხელ მოვუწოდებ, ჯერ დღის დასაწყისია, რომ მიიღონ ამ პროცესში ბოლომდე მონაწილეობა როგორც ამას სახალხო დამცველი აკეთებს“, - განაცხადა წულუკიანმა.

მისივე თქმით, კუნკურსის ფარგლებში დღეს მოსამართლეობის 2 კანდიდატი უნდა შეირჩეს. 

„ ერთი კანდიდატი ბატონი ლადო ჭანტურია უკვე შრჩეულია და დღეს ჩვენ უკვე მე-2 და მე-3 კანდიდატი უნდა შევარჩიოთ, რომლებიდანაც ან 2 უნდა იყოს ქალი კანდიდატი, ან ერთ-ერთი - მაინც, ასეთია მოთხოვნა. ასევე ვითვალისწინებთ დღევანდელი გასაუბრებებისას 2017 წლის 21 ივლისს წერილს, რომელიც კომისიამ ევროსაბჭოდან მიიღო, სადაც პირდაპირ არის მითითებული საქართველოსთვის ის დამატებითი კრიტერიუმები, რომლითაც ჩვენ დღეს უნდა ვიხელმძღვანელოთ“, - განაცხადა მინისტრმა. 

იუსტიციის სამინისტროში ადამიანის უფლებათა ევროპულ სასამართლოში საქართველოდან ასარჩევი მოსამართლეობის კანდიდატთა შესარჩევი კონკურსი დაიწყო. სტრასბურგის სასამართლოში საქართველოდან მოსამართლეების შესარჩევი კონკურსი მესამედ გამოცხადდა.

სპეციალური სამთავრობო კომისია 8 პრეტენდენტს გაესაუბრება.

ადამიანის უფლებათა ევროპულ სასამართლოში მოსამართლეობის კანდიდატთა შერჩევის პროცესს კოალიცია „დამოუკიდებელი და გამჭვირვალე მართლმსაჯულებისთვის“ ბოიკოტს უცხადებს. ამის შესახებ კოალიციის განცხადებაშია ნათქვამი. ხვალინდელ სხდომაში მონაწილეობას არ მიიღებს ასევე ადვოკატთა ასოციაციის ხელმძღვანელი ზაზა ხატიაშვილი.

საქართველოს მთავრობამ სტრასბურგის მოსამართლეობის 3 კანდიდატი: ლადო ჭანტურია, სოფიო ჯაფარიძე და შოთა გეწაძე 1 ივნისს შეარჩია. სტრასბურგის კოლეგიის გადაწყვეტილებით, შემდეგ ტურში მხოლოდ ლადო ჭანტურია გადავიდა.

მანამდე ევროპული საბჭოს საპარლამენტო ასამბლეამ საქართველოდან წარდგენილი სია - ევა გოცირიძე, ალექსანდრე ბარამიძე, გიორგი ბადაშვილი - 24 იანვარს ჩააგდო.