გურამ მაჭარაშვილი: რეგიონული განვითარებისა და ინფრასტრუქტურის სამინისტრომ მხოლოდ 2021 წელს 5600 პროექტი განახორციელა

პარლამენტის საპროცედურო საკითხთა და წესების კომიტეტის თავმჯდომარის პირველმა მოადგილემ, გურამ მაჭარაშვილმა რეგიონული განვითარებისა და ინფრასტრუქტურის სამინისტროს მუშაობა წარმატებულად შეაფასა და აღნიშნა, რომ ინფრასტრუქტურის პროექტების მასშტაბურობას ოპოზიციის წარმომადგენლებიც ვერ მალავენ.

„რეგიონული განვითარებისა და ინფრასტრუქტურის სამინისტრო, მინისტრის, მისი მოადგილეების და სამსახურის ხელმძღვანელების ჩათვლით, 24 საათის განმავლობაში მუშაობენ, რათა მთელ საქართველოში როგორც რეგიონული განვითარება, ასევე ინფრასტრუქტურული პროექტები იყოს იმ დონეზე, რა დონეზეც უკვე პრაქტიკულად ოპოზიციაც ვეღარ მალავს იმას, რომ ეს მასშტაბები საკმაოდ გაზრდილია. ისიც კარგია, რომ ოპოზიცია დღეს საუბრობს თუნდაც იმ პრობლემებზე, რაც დღეს არის და იმაზეც საუბრობს, რაც მათი ხელისუფლების პირობებში იყო ინფრასტრუქტურულ პროექტებზე გამოყოფილი, ჩვენი ხელისუფლების პირობებში ეს ხერხდება ერთი წლის სახელმწიფო ბიუჯეტიდან გამოყოფილი თანხებით ინფრასტრუქტურის სამინისტროში. აქედან გამომდინარე, ამის ათვისება არ არის მარტივი და სწორედ ეს გუნდი ახერხებს იმას, რომ 2.5 მლრდ. ლარის ინვესტირება 5 600 პროექტში მოხერხდეს და ეს ციფრი არის მზარდი. მიუხედავად ასეთი პოზიტიური განწყობისა, ოპოზიციონერი გამომსვლელებისგან მოველოდით არასამართლიან კრიტიკას, თუმცა კრიტიკა ჩვენ არ გვაშინებს. კიდევ ერთხელ მინდა აღვნიშნო, რომ როდესაც ვსაუბრობთ განსაკუთრებით ოპოზიციის რაღაც ბრალდებებზე, მტკიცებულებები როგორც წესი არ აქვთ ხოლმე. ერთ-ერთმა ოპონენტმა განაცხადა, რომ „ქართული ოცნების“ შემომწირველები იგებენ ტენდერებს. ჩვენ გვაქვს მონაცემები, რომ 2021 წელს 5600 პროექტი განხორციელდა და 1500 კომპანია იყო ჩართული. ეს რას ნიშნავს, რომ 1500 კომპანია ჰყავს „ქართულ ოცნებას“ ერთ წელიწადში? საკმაოდ სოლიდური შემომწირველები გვყოლია ჩვენ მაშინ. ასე ხელაღებით თქვათ, რომ ყველა კომპანია, მათი უმრავლესობა ვინც ტენდერებს იგებს ჩვენი შემომწირველია ასე თქმა არ შეიძლება, საზოგადოება არ უნდა შეიყვანოთ შეცდომაში“, - განაცხადა გურამ მაჭარაშვილმა.