არჩილ თალაკვაძე: აქციის ორგანიზატორები რომ ეუბნებიან ოპოზიციას, თქვენ არ მოხვიდეთ და არაფერი თქვათო, ეს იმაზე მიუთითებს, როგორი გაკოტრებულია რადიკალური ოპოზიცია, ისინი საზოგადოებისთვის პოლიტიკურ საფრთხობელასავით გამოიყურებიან

სანამ ევროკომისია იმსჯელებდა, პარლამენტში ჩვენ ღიად დავსვით საკითხი, ოპოზიციას ვკითხეთ პირდაპირ - უჭერთ თუ არა მხარს საქართველოსთვის კანდიდატის სტატუსი მინიჭებას, ახლა, ამ მოცემულობით, - მათ მხარი არ დაუჭირეს, მხოლოდ „გირჩის“ და ევროსოცების წარმომადგენლებმა დააფიქსირეს მხარდაჭერა, დანარჩენმა ოპოზიციურმა სპექტრმა მხარი არ დაუჭირა საკუთარი ქვეყნისთვის უპირობოდ სტატუსის მინიჭებას. ეს ნიშნავს, რომ ისინი საკუთარ სამშობლოს უყენებდნენ პირობებს და თავისი ვიწრო პოლიტიკური ინტერესებისთვის ევროპას ეუბნებოდნენ, რომ ამ ხელისუფლების პირობებში როგორმე არ უნდა მისცეთ სტატუსი საქართველოსო. ეს იყო მათი მთავარი თხოვნა, როცა ევროდერეფნებში შეხვედრებს მართავდნენ, - ამის შესახებ საპარლამენტო უმრავლესობის წევრმა არჩილ თალაკვაძემ „ქრონიკასთან“ განაცხადა.

თალაკვაძე გამოეხმაურა დღეს დაგეგმილ აქციასაც. მისი თქმით, აქციის ორგანიზატორებს ესმით, რომ რადიკალური ოპოზიციის გამოჩენა და მათი საუბარი პირდაპირ წინააღმდეგობაში მოდის ევროპულ იდეასთან, თუმცა მისივე თქმით, ფარდის უკან მათ შორის გარკვეული შეთანხმება არსებობს.

„აქციის ორგანიზატორები რომ ეუბნებიან ოპოზიციას, რომ თქვენ არ მოხვიდეთ და არაფერი თქვათო, ეს თავისთავად მიუთითებს იმას, როგორი გაკოტრებულია რადიკალური ოპოზიცია, ისინი რეალურად პოლიტიკურ საფრთხობელასავით გამოიყურებიან საზოგადოებისთვის. ეს არის მცდელობა, რომ მოატყუონ საზოგადოება, რომ რადიკალური ოპოზიცია მიტინგზე არ გამოვა. ორგანიზატორებს ესმით, რომ მათი გამოჩენა აქციაზე და მათი საუბარი პირდაპირ წინააღმდეგობაში მოდის ევროპულ იდეასთან, იმიტომ რომ ეს ანტიევროპული ძალების გაერთიანებაა, რომელიც ანტისახელმწიფოებრივი, ანტიევროპული პოლიტიკით გამოირჩეოდნენ ადრეც და დღესაც. საკუთარ სამშობლოს უწევდნენ წინააღმდეგობას და საქართველოს დასაბლოკად მუშაობდნენ გადაწყვეტილების მიღების პროცესში. ორგანიზატორებს ესმით, რომ პირველ ეტაპზე რადიკალური ოპოზიციის გამოჩენა იქნება კონტრპროდუქტიული, მაგრამ ფარდის უკან არსებობს შეთანხმება, როგორც ეს იყო ყოველთვის, რომ თუ ჩვენ შევძელით პროცესების გადაყვანა პიკში და კულმინაციაში, მაშინ გადავწევთ ფარდას და იქ უკვე გამოჩნდებიან ცნობილი და ხალხისთვის „საყვარელი“ პოლიტიკოსები, როგორიცაა მელია, უგულავა, სხვა ადამიანები, რომლებმაც მათი მმართველობის დროს მიიყვანეს ეს ქვეყანა კატასტროფამდე და თუ რამე ანტიევროპული რეკორდი ჰქონდა საქართველოს, სწორედ მათი ხელისუფლების დროს მოხდა ეს“, - განაცხადა თალაკვაძემ.