ვიქტორ ყიფიანი: ნატოს შეკრება ყოველთვის ღირსშესანიშნავი მოვლენა და ფაქტია, მაგრამ ეს სამიტი უდავოდ გამოკვეთილი და გამორჩეულია - ნატოს მიეცა საშუალება, საკუთარი თავი ხელახლა იპოვოს და აღმოაჩინოს

„ნატოს შეკრება ყოველთვის ღირსშესანიშნავი მოვლენა და ფაქტია, მაგრამ ეს სამიტი უდავოდ გამოკვეთილი და გამორჩეულია ბოლო სამი თვის მოვლენების ფონზე, რაც უკრაინაში ომმა განაპირობა“, - ამის შესახებ ანალიტიკური ჯგუფის, „ჯეოქეისის“ თავმჯდომარემ, ვიქტორ ყიფიანმა „ქრონიკის“ ეთერში განაცხადა.

მისი თქმით, ჩრდილოატლანტიკურ ალიანსს ახლა „საკუთარი თავის ხელახლა პოვნისა და აღმოჩენის“ საშუალება აქვს.

„თუ ჩვენ ომამდელ პერიოდში ნატოს მდგომარეობას გავიხსენებთ, ნატოსადმი არაერთი კრიტიკა გაისმოდა, ზოგი - დასაბუთებული, ზოგი - დაუსაბუთებელი. სხვადასხვა ქვეყნის ლიდერი, სხვადასხვა ეტაპზე, კრიტიკის ზღვარსაც კი გადასცდა. მოგეხსენებათ ტრამპის ცნობილი განცხადებები და ა.შ. ნატოს მიეცა საშუალება, საკუთარი თავი ხელახლა იპოვოს და აღმოაჩინოს - უსაფრთხოებისა თუ საფრთხეების გარემოს, რომელიც ევროპის კონტინენტზე შეიქმნა, ადეკვატურად უპასუხოს, არა მარტო პოლიტიკური განცხადებებისა და შეფასებების დონეზე, არამედ ქმედითი ნაბიჯები გადადგას. ერთი რამ ფაქტია, როდესაც ჩვენი ნატოელი და დასავლელი პარტნიორები, სხვადასხვა სავარჯიშოსთან დაკავშირებით, გვეუბნებიან ხოლმე, რომ „ეს არის თქვენი შესაძლებლობების ფანჯარა“, ალბათ, ჩვენ თანაბარწილად შეგვიძლია, ნატოსთან მიმართებით ვთქვათ - ამ შემთხვევაში, მადრიდის სამიტი ნატოსთვის არის შესაძლებლობა, რომ საკუთარი თავი ხელახლა დასვას მსოფლიო უსაფრთხოების რუკაზე და სწორი პრიორიტეტები და ორიენტირები მონიშნოს“, - განაცხადა ვიქტორ ყიფიანმა.

მადრიდში ჩრდილოატლანტიკური ალიანსის მორიგი სამიტი იმართება. მასში მონაწილეობისთვის საქართველოს პრემიერ-მინისტრი, ირაკლი ღარიბაშვილიცაა მიწვეული. ის მადრიდში დღეს გაემგზავრა.