კვირიკაშვილი: რუსეთის ჩართულობაზე უამრავი სპეკულაცია მოვისმინე

საქართველოს პრემიერმინისტრი მთავრობის დღევანდელ სხდომაზე ბორჯომის ხანძრის სალიკვიდაციო სამუშაოებში რუსეთის ჩართვის საკითხს გამოეხმაურა. პრემიერმა სამარცხვინო უწოდა იმ განცხადებებს, რაც ამ საკითხთან დაკავშირებით გაკეთდა.

"მადლობა მინდა გადავუხადო მეზობელ ქვეყნებს, რომლებმაც მონაწილეობა მიიღეს წაღვერის სტიქიის დაძლევაში. ეს არის თურქეთი, აზერბაიჯანი, სომხეთი, ბელარუსი. რაც უნდა კარგად იყოს ქვეყანა მომზადებული ასეთი სტიქიისთვის, რეგიონული ჩართულობა აუცილებელია. 

უამრავი სპეკულაცია მოვისმინე რუსეთის ჩართვასთან დაკავშირებით. არ მინდა მწვავე გამოთქმები ვიხმარო, მაგრამ სამარცხვინოა, რაც მოვისმინე. ჩვენთვის უპირველესი ქვეყნის ინტერესების დაცვაა. მე, როგორც ქვეყნის პრემიერმინისტრს, არ მაქვს უფლება, რეზერვში არ მქონდეს ყველა შესაძლო საშუალება. საშიშროება იმისა, რომ სტიქიას უფრო დიდი მასშტაბი მისცემოდა საკმაოდ რეალური იყო. 

კარგად მახსოვს, ოთხშაბათი საღამო, როდესაც ქარმა პრაქტიკულად იმავე მასშტაბით გააღვივა ცეცხლი, რაც გვქონდა სტიქიის დასაწყისში. ამიტომ, კიდევ ერთხელ მინდა, უბრალოდ, ჩვენს თანამოქალაქეებს ვუთხრა, სათანადოდ შეაფასონ ასეთი ტიპის გამოსვლები. მთავრობას გააჩნია გაცილებით მეტი პასუხისმგებლობა თითოეული ჩვენი თანამოქალაქის, მისი სიცოცხლის, ქონების დაცვის თვალსაზრისით და ჩვენ ყოველთვის ღირსეულად მოვიქცევით ყოველ ასეთ შემთხვევაში. ჩვენს მანდატს, რომელიც ჩვენმა მოსახლეობამ მოგვანიჭა, ღირსეულად აღვასრულებთ.

ჩვენ არაფერი თავის სამართლებელი ჩვენს მოსახლეობასთან არ გვაქვს. რა თქმა უნდა, ემოციები ასეთ დროს ყველას აქვს, მაგრამ არის სიტუაციები, როდესაც უნდა დავძლიოთ ეს ემოციები და კონსოლიდაციით, გაერთიანებით შევუტიოთ ხოლმე ასეთ გამოწვევებს", - განაცხადა გიორგი კვირიკაშვილმა.

პრემიერმინისტრმა მთავრობის სხდომაზე ფინანსთა მინისტრს სტიქიაში მონაწილე პირებზე პრემიების გაცემის საკითხის მოგვარება დაავალა.

კვირიკაშვილი აბასთუმნის ტყის ხანძარსაც გამოეხმაურა და განაცხადა, რომ მისი ჩაქრობა კლიმატურ პირობებზე მნიშვნელოვნად არის დამოკიდებული.

დილიდან აბასთუმანში ხანძრის ჩაქრობის პროცესში ავიაცია ჩაერთო. დღეიდან სტიქიის ზონაში 7 საფრენი საშუალება იმუშავებს.

ხანძარი აბასთუმანში გუშინწინ დღის მეორე ნახევარში გაჩნდა.

29 აგვისტოს საგარეო საქმეთა სამინისტროში დაადასტურეს, რომ ბორჯომის ხეობაში ხანძრის ჩამქრობი ტექნიკით დახმარებაზე რუსეთის ფედერაციასთან მოლაპარაკება გაიმართა. სამინისტროში ამბობენ, რომ შვეიცარიის საელჩოს მეშვეობით რუსეთის მხარეს შესაბამისი ნოტა გაეგზავნა. 

კარასინთან სატელეფონო საუბარი დაადასტურა ზურაბ აბაშიძემაც, თუმცა 26 აგვისტოს საქართველოს რეგიონული განვითარებისა და ინფრასტრუქტურის მინისტრი, ზურაბ ალავიძე ამბობდა, რომ რუსეთს ხანძრის ჩასაქრობად მოთხოვნა გაერომ გაუგზავნა.