ალეკო ელისაშვილი: ოპოზიციის ნაწილის დამოკიდებულება - „იცი რა, ევროკავშირმა კი გვითხრა, რომ ოპოზიცია და მმართველი პარტია ერთად დასხედით და 12 პუნქტზე იმუშავეთ, მაგრამ მე მაინც არ დავჯდები“ ევროკავშირის რეკომენდაციების უგულებელყოფაა

„მოქალაქეების“ ერთ-ერთმა ლიდერმა, ალეკო ელისაშვილმა „ქრონიკის“ პირდაპირ ეთერში, ევროკომისიის რეკომენდაციების შესრულებასა და დეოლიგარქიზაციის შესახებ კანონზე მუშაობის შესახებ ისაუბრა. მისი თქმით, სამუშაო მაგიდასთან არა მხოლოდ მმართველი პარტია, არამედ ოპოზიციის ის ნაწილიც უნდა დაჯდეს, რომელიც მუშაობაში ჩართვაზე უარს ამბობს.

„ჩემთვის, ახლაც გაუგებარია ოპოზიციის ნაწილის დამოკიდებულება - „იცი რა, ევროკავშირმა კი გვითხრა, რომ ოპოზიცია და მმართველი პარტია ერთად დასხედით და 12 პუნქტზე იმუშავეთ, მაგრამ მე მაინც არ დავჯდები“. ოპოზიციის ნაწილს ასეთი პოზიცია აქვს. ეს, უბრალოდ, არ მესმის. ეს ნიშნავს, რომ ევროკავშირის რეკომენდაციებს უგულებელყოფ. თუ ევროკავშირისკენ, ევროპისკენ გვინდა, მაშინ, ეს რეკომენდაციებიც უნდა გავითვალისწინოთ. იქ [რეკომენდაციებში] არ წერია, მხოლოდ „ქართულმა ოცნებამო“, იქ წერია, რომ ყველა უნდა დაჯდეს და ილაპარაკოს. რაც შეეხება დეოლიგარქიზაციას, მე ღრმად მწამს, რომ „ქართული ოცნება“ ყველაფერს გააკეთებს, რომ ბიძინა ივანიშვილი ამ კანონის [დეოლიგარქიზაციის შესახებ კანონის] გავლენის ქვეშ არ მოექცეს და ეს კანონი მასზე არ გავრცელდეს“, - განაცხადა ალეკო ელისაშვილმა.

დღეს დეოლიგარქიზაციის საკითხზე პირველი სამუშაო შეხვედრა გაიმართა. სამუშაო ჯგუფებს კვლავ ბოიკოტს უცხადებენ „ნაციონალური მოძრაობა“, „ლელო“ და „სტრატეგია აღმაშენებელი“.

„დეოლიგარქიზაციის ერთგულება, რომელიც მიღწეული უნდა იყოს ეკონომიკურ, პოლიტიკურ და საზოგადოებრივ ცხოვრებაში, კერძო ინტერესების გადაჭარბებული გავლენის აღმოფხვრით“ - ასეთია ევროკომისიის რეკომენდაციის მეხუთე პუნქტის ჩანაწერი.